റിയാദ്: 2034 ലെ ലോകകപ്പ് ഫുട്ബാൾ മത്സരത്തിന് വേണ്ടിയുള്ള തയ്യാറെടുപ്പുകൾ ആരംഭിച്ച് സൗദി അറേബ്യ. ഇതിനായി ഔദ്യോഗിക ലോഗോയും വെബ്സൈറ്റും പ്രകാശനം ചെയ്തു. സൗദി ഫുട്ബോൾ ഫെഡറേഷനാണ് ഇക്കാര്യം അറിയിച്ചത്. saudi2034bid.com എന്നതാണ് ഔദ്യോഗിക വെബ്സൈറ്റ്. ‘വളരുന്നു, ഞങ്ങൾ ഒരുമിച്ച്’ എന്ന ശീർഷകത്തോട് കൂടിയ ലോഗോ ആണ് സൗദി ഫുട്ബോൾ ഫെഡറേഷൻ പ്രഖ്യാപിച്ചിരിക്കുന്നത്.
ലോകകപ്പ് ടൂർണമെന്റിന് ആതിഥേയത്വം വഹിക്കുന്നത് സംബന്ധിച്ച പ്രഖ്യാപനം സൗദി അറേബ്യ നടത്തിയത് കഴിഞ്ഞവർഷം ഒക്ടോബറിലാണ്. തുടർന്ന് സൗദി ഫുട്ബാൾ ഫെഡറേഷൻ ഔദ്യോഗിക നാമനിർദേശ കത്ത് ഇന്റർനാഷനൽ ഫെഡറേഷൻ ഓഫ് അസോസിയേഷൻ ഫുട്ബാളിന് (ഫിഫ) സമർപ്പിച്ചു. ഫുട്ബാൾ ലോകത്തെ ഏറ്റവും ത്വരിത ഗതിയിലുള്ള വളർച്ചയും സൗദി അറേബ്യ സാധ്യമാക്കിയ വലിയ പരിവർത്തനവും ധ്വനിപ്പിക്കുന്നതാണ് ലോഗോ എന്ന് സൗദി ഫുട്ബാൾ ഫെഡറേഷൻ പത്രപ്രസ്താവനയിൽ വ്യക്തമാക്കി.
‘ഒരുമിച്ച് മനുഷ്യരുടെ കഴിവുകൾ വികസിപ്പിക്കാൻ’, ‘ഒരുമിച്ച് ഫുട്ബാൾ വികസിപ്പിക്കാൻ’, ‘ഒരുമിച്ച് ആശയവിനിമയത്തിന്റെ പാലങ്ങൾ വികസിപ്പിക്കാൻ’ എന്നീ മൂന്ന് പ്രധാന സ്ലോഗനുകൾ ഉൾപ്പെടുന്നതാണ് സൗദി നാമനിർദേശ ഫയൽ. രാജ്യത്തിന്റെ സമ്പന്നമായ സാംസ്കാരിക പൈതൃകത്തിന്റെയും യുവജനങ്ങളും ഊർജസ്വലവുമായ സമൂഹത്തിന്റെയും സത്തയെ പ്രതിഫലിപ്പിക്കുന്നതാണ് ലോഗോയുടെ രൂപകൽപ്പന.