കരിങ്കൊടി പ്രതിഷേധം നടത്തുന്ന യൂത്ത് കോണ്ഗ്രസ് പ്രവര്ത്തകരെ ആക്രമിക്കുന്നതിൽ പ്രതിഷേധം കടുപ്പിക്കാനൊരുങ്ങി കോൺഗ്രസ്.പൊലീസിന്റെ സാന്നിധ്യത്തില് കായംകുളത്ത് അംഗപരിമിതനായ യൂത്ത് കോണ്ഗ്രസ് പ്രവര്ത്തകനെ ഡിവൈെഫ്ഐക്കാര് ആക്രമിച്ചതിലും മുഖ്യമന്ത്രിയുടെ ഗണ്മാന് യൂത്ത് കോണ്ഗ്രസുകാരെ അടിച്ചതിലുമാണ് നടപടി.
ഡിജിപി ഓഫീസിലേക്ക് നവ കേരള സദസിന്റെ സമാപന ദിവസം മാർച്ച് നടത്തും. മാർച്ച് കെപിസിസി പ്രസിഡന്റ് കെ. സുധാകരൻ നയിക്കും. എംഎല്എ മാരും എംപി മാരും പ്രതിഷേധ മാര്ച്ചില് പങ്കെടുക്കും. അതിനിടെ കെ മുരളീധരൻ എം പി നവകേരള യാത്രയിലെ യൂത്ത് കോൺഗ്രസ് പ്രവർത്തകർക്കു നേരെയുള്ള മർദനത്തില് സംസ്ഥാന നേതൃത്വത്തിനെതിരെ രംഗത്ത് വന്നിരുന്നു.
സംസ്ഥാന നേതാക്കൾ വിഷയത്തിൽ നടത്തുന്ന പ്രസ്താവനയിലെ മൂർച്ച ആക്ഷനിൽ കാണാനില്ലെന്ന് അദ്ദേഹം പറഞ്ഞു. കെപിസിസി രാഷ്ട്രീയ കാര്യ സമിതിയിൽ ഇക്കാര്യം ചർച്ച ചെയ്യും. ജീവൻരക്ഷാ പ്രവർത്തനം യൂത്ത് കോൺഗ്രസ് പ്രവർത്തകരും നടത്തണമെന്നും പാർട്ടിയുടെ പൂർണ്ണ പിന്തുണ ഉണ്ടാകുമെന്നും കെ മുരളീധരൻ പറഞ്ഞു.