ഏഴാം നമ്പർ ജേഴ്സി എന്ന് ഫുട്ബോളിൽ കേൾക്കുമ്പോൾ ആദ്യം മനസ്സിൽ വരുന്നത് പോർച്ചുഗീസ് ഇതിഹാസം ക്രിസ്റ്റ്യാനോ റൊണാൾഡോയുടെ മുഖമാണ്. അത് പോലെ തന്നെ ക്രിക്കറ്റിന്റെ കാര്യമെടുത്താൽ ഒരേയൊരു അവകാശി മാത്രമേ ഏഴാം നമ്പറിനുള്ളു.മുൻ ഇന്ത്യൻ നായകൻ മഹേന്ദ്ര സിംഗ് ധോണി. അസാധ്യമെന്നു കരുതിയ ഉയരങ്ങളിലേക്കാണ് ഏഴാം നമ്പർ ജേഴ്സിയണിഞ്ഞ് ധോണി ഇന്ത്യയെ നയിച്ചത്.
ഇന്ത്യക്ക് മൂന്ന് ഐസിസി കിരീടങ്ങള് സമ്മാനിച്ച ക്യാപ്റ്റന് കൂടിയാണ് ധോണി. മഹിയുടെ സംഭാവനകൾ ഇന്ത്യൻ ടീമിനും ക്രിക്കറ്റിനും മറക്കാനാവില്ല. ടീമിന് ഇനി ഇതുപോലൊരു നായകനെ ലഭിക്കില്ല എന്ന് തന്നെ പറയാം. ഇന്ത്യക്ക് ധോണിയും അദ്ദേഹം ധരിച്ച ഏഴാം നമ്പർ ജേഴ്സിയും എന്നും പ്രിയപ്പെട്ടതായിരിക്കും.
ഇപ്പോഴിതാ എം.എസ് ധോണിയോടുള്ള ആദരവ് പ്രകടിപ്പിച്ച ബിസിസിഐ തന്നെ രംഗത്തെത്തിയിരിക്കുകയാണ്. ഇനി മറ്റാര്ക്കും ധോണി ഉപയോഗിച്ചിരുന്ന ഏഴാം നമ്പര് ജേഴ്സി ഉപയോഗിക്കാനാകില്ല. ബിസിസിഐ കരിയറിൽ ധോണി ധരിച്ച ഏഴാം നമ്പർ ജേഴ്സി പിൻവലിച്ചു. ഏഴാം നമ്പര് ജേഴ്സിയുടെ വിരമിക്കല് പ്രഖ്യാപിച്ചത് ധോണിക്ക് നല്കുന്ന ആദരവിന്റെ ഭാഗമായാണ്. ഇത്തരത്തില് ഒരു ജേഴ്സിയുടെ വിരമിക്കല് ഇതിനു മുന്പ് പ്രഖ്യാപിച്ചത് സച്ചിന് ടെന്ഡുല്ക്കറുടെ പത്താം നമ്പർ ജേഴ്സിയാണ്.
ഇനി മുതല് 7, 10 നമ്പറുകള് ഇനി ലഭ്യമല്ലെന്ന് ബിസിസിഐ കളിക്കാരെ അറിയിച്ചതായി ദേശീയ മാധ്യമങ്ങള് റിപ്പോര്ട്ട് ചെയ്തു.60 വ്യത്യസ്ത നമ്പറിലുള്ള ജഴ്സികൾ നിലവിൽ ഇന്ത്യൻ താരങ്ങൾക്ക് ലഭ്യമാണെന്നും ബിസിസിഐ വ്യക്തമാക്കി. ഒരു കളിക്കാരന് ഒരു വര്ഷത്തേക്ക് ടീമിന് പുറത്താണെങ്കില് പോലും അവന്റെ നമ്പര് മറ്റാര്ക്കും നല്കില്ല. അരങ്ങേറ്റക്കാര്ക്ക് തിരഞ്ഞെടുക്കാന് 30 നമ്പറുകളുണ്ടെന്നും ബിസിസിഐ ഉദ്യോഗസ്ഥന് പറഞ്ഞു.