ഗൂഗിൾ പേ യുപിഐ വഴി ഫോൺ റീചാർജ് ചെയ്താൽ ഇനി അധിക പണം നൽകണമെന്ന് റിപ്പോർട്ട്. അധിക രൂപ നൽകേണ്ടി വരുന്നത് ഗൂഗിൾ പേയിലൂടെ പ്രീപെയ്ഡ് പ്ലാൻ വാങ്ങുന്ന ഉപയോക്താക്കൾക്കാണ്.നേരത്തെ തന്നെ പേയ്ടിഎം, ഫോൺ പേ എന്നീ യുപിഐ ആപ്പുകൾ ഫോൺ റീചാർജിന് സർവീസ് ചാർജ് ഈടാക്കിയിരുന്നു. ഗൂഗിൾ പേയും ഇക്കൂട്ടത്തിലേക്കാണ് വന്നിരിക്കുന്നത്. ഔദ്യോഗികമായി ഗൂഗിൾ പേ സർവീസ് ചാർജിന്റെ കാര്യം ഉപയോക്താക്കളെ അറിയിച്ചിട്ടില്ല. മൂന്ന് രൂപ അധികമായി ഗൂഗിൾ പേ യുപിഐ വഴി ഫോൺ റീചാർജ് ചെയ്ത ഉപയോക്താക്കൾക്ക് നൽകേണ്ടി വന്നു. ഇത് ശ്രദ്ധയിൽപ്പെട്ടതോടെയാണ് ജി-പേയും റീചാർജിനായി സർവീസ് ചാർജ് ഏർപ്പെടുത്തിയത് അറിയുന്നത്.
കൺവേയൻസ് ഫീ നൂറ് രൂപയ്ക്ക് താഴെ വരുന്ന ഫോൺ റീചാർജുകൾക്ക് വരില്ല. എന്നാൽ നൂറ് രൂപയ്ക്കും 200 രൂപയ്ക്കും മധ്യേ വരുന്ന റീചാർജുകൾക്ക് രണ്ട് രൂപയും 200-300 രൂപയ്ക്ക് മധ്യേ വരുന്ന റീചാർജുകൾക്ക് മൂന്ന് രൂപയുമാണ് അധിക ചാർജ് വരിക. മൂന്ന് രൂപ തന്നെയാണ് 300 രൂപയ്ക്ക് മുകളിലുള്ള റീചാർജുകൾക്കും കൺവേയൻസ് ഫീ ആയി ഈടാക്കുക. കൺവേയൻസ് ഫീ കൂടാതെ റീചാർജ് ചെയ്യാൻ ഇനി മുതൽ അതത് ടെലിക്കോം ഓപറേറ്ററുടെ വെബ്സൈറ്റ് വഴിയോ മൊബൈൽ ആപ്പ് വഴിയോ മാത്രമേ സാധ്യമാകൂ എന്ന് ചുരുക്കം.