തിരുവനന്തപുരം: നവകേരള സദസിൽ മുഖ്യമന്ത്രിക്കും മന്ത്രിമാർക്കും യാത്ര ചെയ്യാനായുള്ള ആഢംബര ബസ്സിന് വേണ്ടി കോൺട്രാക്ട് ക്യാരേജ് ബസുകൾക്കായുള്ള നിയമത്തിൽ ഭേദഗതി വരുത്തി സംസ്ഥാന സർക്കാർ. ഇതുസംബന്ധിച്ച ഉത്തരവ് സർക്കാർ പുറത്തിറക്കി. ബസ്സിനായി പ്രത്യേക ഇളവുകളാണ് സർക്കാർ വരുത്തിയിരിക്കുന്നത്. ഇതുസംബന്ധിച്ച് ഗതാഗതവകുപ്പിറക്കിയ വിജ്ഞാപനത്തിന്റെ പകർപ്പ് മാദ്ധ്യമങ്ങൾ പുറത്തുവിട്ടു.
നവകേരള ബസ്സിനുള്ള ആഡംബര ബസ്സിന്റെ മുൻനിരയിലെ സീറ്റിന് 180 ഡിഗ്രി കറങ്ങാനുള്ള അനുമതി നൽകിയതായി വിജ്ഞാപനത്തിൽവ്യക്തമാക്കുന്നു. ഈ ബസ്സിനുവേണ്ടി മാത്രമായി കോൺട്രാക്ട് ക്യാരേജ് വാഹനങ്ങൾക്ക് നൽകിയിരിക്കുന്ന കളർ കോഡിനും ഇളവ് അനുവദിച്ചു. വാഹനം നിർത്തുമ്പോൾ പുറത്തുനിന്നും വൈദ്യുതി ജനറേറ്റർ വഴിയോ ഇൻവെട്ടർ വഴിയോ വൈദ്യുതി നൽകാനും അനുമതിയുണ്ട്. നവകേരള സദസ്സിനുവേണ്ടിയിറക്കിയ ആഢംബര ബസ്സിന് മാത്രമായിരിക്കും ഇളവുകൾ ബാധകം.
കെഎസ്ആർടി.സി എംഡിയുടെ ശുപാർശയിലാണ് സർക്കാർ വിജ്ഞാപനം പുറത്തിറക്കിയത്. കോൺട്രാക്ട് ക്യാരേജ് വാഹനങ്ങൾക്ക് വെള്ള നിറം വേണമെന്നാണ് സർക്കാർ ഉത്തരവ്. എന്നാൽ, ഇതിൽ നവകേരള ബസിന് ഇളവ് നൽകിയിട്ടുണ്ട്. ചോക്ലേറ്റ് ബ്രൗൺ നിറമാണ് ബസ്സിന് നൽകിയിരിക്കുന്നത്. വിവിഐപികൾക്കുള്ള ബസ്സിനും ടൂറിസം ആവശ്യത്തിനുമാണ് ഇളവന്നാണ് ഉത്തരവ് ചൂണ്ടിക്കാട്ടുന്നത്. 12 മീറ്റർ വാഹനത്തിനാണ് ഇളവ്. സർക്കാർ ആവശ്യപ്പെടുമ്പോൾ വാഹനം വിൽക്കണമെന്നും സർക്കാർ വിജ്ഞാപനത്തിൽ പറയുന്നു.