ഗർഭിണിയായതിന് ശേഷമാണ് താൻ സ്വയം പര്യാപ്തയായതെന്ന് നടി സ്നേഹ ശ്രീകുമാർ. ഗർഭകാലത്ത് ഒറ്റയ്ക്ക് ഡ്രൈവ് ചെയ്താണ് ആശുപത്രിയിലേക്ക് പോയിട്ടുള്ളതെന്നും സ്നേഹ പറഞ്ഞു. ഒരു സ്വകാര്യ മാദ്ധ്യമത്തിന് നൽകിയ പ്രത്യേക അഭിമുഖത്തിലായിരുന്നു സ്നേഹയുടെ വെളിപ്പെടുത്തൽ.
ഗർഭകാലത്ത് ഭർത്താവ് കൂടെ വേണമെന്നാണ് എല്ലാ സ്ത്രീകളും ആഗ്രഹിക്കുക. എന്നാൽ ശ്രീയ്ക്ക് പലപ്പോഴും തന്റെ കൂടെ വരാൻ പറ്റുന്ന സാഹചര്യമല്ലായിരുന്നു. ഒന്നോ രണ്ടോ തവണ മാത്രമേ ആശുപത്രിയിലെ ചെക്കപ്പിനും സ്‌കാനിങ്ങിനുമൊക്കെ ശ്രീ വന്നിട്ടുള്ളു. ബാക്കിയൊക്കെ താൻ ഒറ്റയ്ക്ക് ഡ്രൈവ് ചെയ്താണ് ആശുപത്രിയിലേക്ക് പോയിട്ടുള്ളതെന്ന് സ്നേഹ പറഞ്ഞു.
മകൻ കേദാർ വന്നതിന് ശേഷം തങ്ങളുടെ ജീവിതം ആകെ മാറി മറിഞ്ഞു. കേദാർ വലിയ വാശിക്കാരനൊന്നുമല്ല. കുഞ്ഞ് ജനിച്ച് മുപ്പത്തിയേഴാമത്തെ ദിവസം മുതൽ താൻ അഭിനയിക്കാൻ പോകാൻ തുടങ്ങി. കേദാറും തനിക്കൊപ്പം അഭിനയിച്ചു. മകനൊപ്പം അമ്മയായി അഭിനയിക്കാനുള്ള ഭാഗ്യം തനിക്ക് ലഭിച്ചു. ശ്രീ പ്രസവ സമയത്ത് ആശുപത്രിയിലുണ്ടായിരുന്നില്ല. പ്രസവ ശേഷമാണ് ശ്രീ ആശുപത്രിയിലെത്തിയത്. ഷൂട്ടിന്റെ തിരക്കിലായിരുന്നു. കുഞ്ഞിനെ എടുക്കാൻ ആദ്യം ശ്രീയ്ക്ക് പേടിയായിരുന്നു. സിസ്റ്റർമാർ നിർബന്ധിച്ച് കുഞ്ഞിനെ ശ്രീയുടെ കയ്യിൽ നൽകുകയായിരുന്നു. ഇപ്പോൾ പേടിയൊക്കെ മാറിയെന്നും സ്നേഹ പറയുന്നു.