പൃഥ്വിരാജ് നായകനായി എത്തുന്ന ചിത്രം ആടുജീവിതത്തിന് ആശംസകൾ അറിയിച്ച് തമിഴ് നടൻ സൂര്യ. ആടുജീവിതത്തിന്റെ ട്രെയിലർ പങ്കുവെച്ചുകൊണ്ടാണ് സൂര്യ ആശംസകൾ അറിയിച്ചിരിക്കുന്നത്. അതിജീവനത്തിന്റെ കഥ പറയാനുള്ള 14 വർഷത്തെ അഭിനിവേശമാണ് ആടുജീവിതം എന്ന് സൂര്യ വ്യക്തമാക്കി.
ഈ പരിവർത്തനവും ഇതിനെ ഒരുമിച്ചു കൊണ്ടുവരാനുള്ള പരിശ്രമവും ജീവിതത്തിൽ ഒരിക്കൽ മാത്രമേ സംഭവിക്കൂ. സംവിധായകൻ ബ്ലെസ്സി ആൻഡ് ടീം, പൃഥ്വിരാജ്, എ ആർ റഹ്മാൻ സാർ എന്നിവർക്ക് ഒരു ഗ്രാൻഡ് റിലീസിനായി ഹൃദയം നിറഞ്ഞ ആശംസകൾ നേരുന്നുവെന്ന് സൂര്യ എക്‌സ് പ്ലാറ്റ്‌ഫോമിൽ കുറിച്ചു.
സൂര്യയുടെ പോസ്റ്റിന് പൃഥ്വിരാജ് നന്ദി അറിയിക്കുകയും ചെയ്തു. അതേസമയം മാർച്ച് 28നാണ് ആടുജീവിതം സിനിമ റിലീസ് ചെയ്യുന്നത്. ബ്ലസിയാണ് ചിത്രം സംവിധാനം ചെയ്തിരിക്കുന്നത്. ബെന്യാമിന്റെ പ്രശസ്ത നോവലിനെ ആധാരമാക്കിയാണ് ആടുജീവിതം ഒരുക്കിയിരിക്കുന്നത്. എ ആർ റഹ്മാനാണ് ചിത്രത്തിന്റെ സംഗീത സംവിധാനം നിർവ്വഹിച്ചിരിക്കുന്നത്. ചിത്രത്തിന്റെ സൗണ്ട് ഡിസൈൻ റസൂൽ പൂക്കുട്ടിയും എഡിറ്റിംഗ് ശ്രീകർ പ്രസാദുമാണ്. സുനിൽ കെ എസ് ആണ് ഛായാഗ്രഹണം. അമല പോളാണ് ചിത്രത്തിൽ പൃഥ്വിരാജിന്റെ നായികയായെത്തുന്നത്.