തിരുവനന്തപുരം: സിക്ക വൈറസ് പ്രതിരോധത്തിനായി ആക്ഷന് പ്ലാന് രൂപീകരിച്ചതായി ആരോഗ്യമന്ത്രി വീണ ജോര്ജ്. എല്ലാ ജില്ലകളിലേയും ജില്ലാ മെഡിക്കല് ഓഫീസര്മാരുടെ യോഗത്തിലാണ് മന്ത്രി ഇക്കാര്യം വ്യക്തമാക്കിയത്.രോഗ ബാധ റിപ്പോര്ട്ട് ചെയ്യാന് സാധ്യതയുള്ള പ്രദേശങ്ങളിലും ആശുപത്രികളിലും കേന്ദ്രീകരിച്ച് പ്രതിരോധ പ്രവര്ത്തനങ്ങള് നടത്തുമെന്നും മന്ത്രി അറിയിച്ചു.
പനിയുള്ള ഗര്ഭിണികളില് പരിശോധന നടത്തി സിക്ക വൈറസ് അല്ലെന്ന് ഉറപ്പാക്കാന് നിര്ദേശം നല്കി. കൊതുകു നിവാരണത്തിന് വിവിധ വകുപ്പുകളുടെ ഏകോപിച്ചുള്ള പ്രവര്ത്തനം നടത്തുന്നതാണ്.എല്ലാ ആശുപത്രികളും ജാഗ്രത പാലിക്കണം. സ്വകാര്യ ആശുപത്രികളേയും പ്രതിരോധ പ്രവര്ത്തനങ്ങളില് പങ്കാളികളാക്കുമെന്ന് മന്ത്രി അറിയിച്ചു.
പനി, തലവേദന, ശരീര വേദന, ചുവന്ന പാടുകള് എന്നിവ കണ്ടാല് സിക്കയല്ലെന്ന് ഉറപ്പ് വരുത്തേണ്ടതാണ്.ഈയൊരു സാഹചര്യത്തില് ഡ്രൈ ഡേ ശക്തിപ്പെടുത്തുമെന്ന് മന്ത്രി വ്യക്തമാക്കി.അതേസമയം, തിരുവനന്തപുരം ജില്ലയിലെ ചില പ്രദേശങ്ങളില് നിന്നും നേരത്തെയയച്ച 19 സാമ്പിളുകളില് 13 പേര്ക്ക് സിക്ക പോസിറ്റീവാണെന്ന് എന്.ഐ.വി. പൂനയില് നിന്നും സ്ഥിരീകരിച്ചിട്ടുണ്ട്.