ഔറംഗബാദ്: രണ്ട് തവണ കോവിഡിനെ പൊരുതി തോല്‍പ്പിച്ച് 90കാരന്‍. ബീഡ് ജില്ലയിലെ അഡാസ് സ്വദേശിയായ പാണ്ഡുരംഗ് ആത്മറാം അഗ്ലേവ് എന്നയാളാണ് കോവിഡിനെ ദൃഢനിശ്ചയം കൊണ്ട് തോല്‍പ്പിച്ചത്. മികച്ച ആരോഗ്യ ശീലങ്ങള്‍, ആരോഗ്യകരമായ ജീവിതശൈലി, ക്രിയാത്മക മനോഭാവം എന്നിവയാണ് ഈ 90കാരന്‍ വീണ്ടും ജീവിതത്തിലേയ്ക്ക് മടങ്ങാന്‍ കാരണം.2020 നവംബറിലാണ് ഇദ്ദേഹത്തിന് ആദ്യമായി കൊറോണ വൈറസ് ബാധിച്ചത്.നിയ്ക്ക് ആദ്യമായി അണുബാധയുണ്ടായപ്പോള്‍ അതിന്റെ തീവ്രത കുറവായിരുന്നുവെന്നും എന്നാല്‍ രണ്ടാം തവണ കാര്യങ്ങള്‍ അത്ര എളുപ്പമായിരുന്നില്ലെന്നും അദ്ദേഹം വ്യക്തമാക്കി.ഈ മാസം ആദ്യം പാണ്ഡുരംഗ് വീണ്ടും കോവിഡ് പോസിറ്റീവ് ആയതോടെ അദ്ദേഹത്തെ അംബജോഗൈയിലെ ലോഖണ്ടി സവര്‍ഗാവിലെ ഒരു കോവിഡ് -19 കെയര്‍ സെന്ററില്‍ പ്രവേശിപ്പിച്ചു. ചികിത്സയ്ക്ക് ശേഷം ഏപ്രില്‍ 17ന് ഇദ്ദേഹത്തെ ഡിസ്ചാര്‍ജ് ചെയ്തു.
താന്‍ പതിവായി നടക്കുകയും സമ്മര്‍ദ്ദരഹിതമായ ജീവിതം നയിക്കുകയും ചെയ്തിരുന്ന വ്യക്തായാണെന്നും ഇത് രോഗത്തില്‍ നിന്ന് രക്ഷപെടാന്‍ വളരെയധികം സഹായിച്ചുവെന്നും തന്റെ ആരോഗ്യ രഹസ്യം വെളിപ്പെടുത്തി പാണ്ഡുരംഗ് പറഞ്ഞു.
തനിക്ക് ഓക്‌സിജന്‍ നല്‍കിയിരുന്നെന്നും ഈ സമയത്ത് ആരോഗ്യത്തിലും ഭക്ഷണത്തിലും ശ്രദ്ധ കേന്ദ്രീകരിച്ചിരുന്നെന്നും അദ്ദേഹം കൂട്ടിച്ചേര്‍ത്തു. സ്വാമി രാമണാനന്ദ് തീര്‍ത്ഥ് മെഡിക്കല്‍ കോളേജില്‍ പാണ്ഡുരംഗിനെ ചികിത്സിച്ച ഡോക്ടര്‍മാരെയും മെഡിക്കല്‍ സ്റ്റാഫുകളെയും ഈ തൊണ്ണൂറുകാരന്റെ പോസിറ്റീവ് മനോഭാവം ഏറെ സ്വാധീനിച്ചു.
2021-04-25