തിരുവനന്തപുരം: തുടര്‍ഭരണം പ്രവചിച്ച സര്‍വേഫലങ്ങളെ തള്ളി പ്രതിപക്ഷനേതാവ് രമേശ് ചെന്നിത്തല. ജനവികാരത്തിന്റെ പ്രതിഫലനമല്ല സര്‍വേഫലങ്ങളെന്നും കേരളത്തില്‍ യുഡിഎഫ് അധികാരത്തിലെത്തുമെന്നും ചെന്നിത്തല പ്രതികരിച്ചു. ജനങ്ങളില്‍ ഞങ്ങള്‍ക്ക് വിശ്വാസമുണ്ട്. മുഖ്യമന്ത്രി പിണറായി വിജയന്റെ പ്രസ്താവന പരാജിതന്റെ ആത്മവിശ്വാസമാണെന്നും അണയാന്‍ പോകുന്ന തീ ആളിക്കത്തുകയാണെന്നും ചെന്നിത്തല പരിഹസിച്ചു.
കേരളത്തില്‍ എല്‍ഡിഎഫിന് വിജയം പ്രവചിച്ചാണ് ദേശീയ മാധ്യമങ്ങളുടെ എക്‌സിറ്റ് പോള്‍ ഫലങ്ങള്‍. ഇന്ത്യ ടുഡെ ആക്‌സിസ് മൈ ഇന്ത്യ സര്‍വ്വെ 104- മുതല്‍ 120 വരെ സീറ്റുകള്‍ എല്‍ഡിഎഫിന് നല്‍കുമ്പോള്‍ യുഡിഎഫിന് 20 മുതല്‍ 36 വരെ മാത്രം പ്രവചിക്കുന്നു. ടുഡെയ്‌സ് ചാണക്യ എല്‍ഡിഎഫിന് 102 സീറ്റുകള്‍ നല്കുന്നു. എല്‍ഡിഎഫ് എണ്‍പത് വരെ സീറ്റേ നേടൂ എന്നാണ് സി വോട്ടറിന്റെയും റിപ്പബ്‌ളിക് സിഎന്‍എക്‌സ് സര്‍വ്വെയുടെയും പ്രവചനം.
2021-04-30