കണ്ണൂര് : തിരഞ്ഞെടുപ്പിനിടെയുണ്ടായ സംഘര്ഷത്തില് മുസ്ലിംലീഗ് പ്രവര്ത്തകന് കൊല്ലപ്പെട്ടു. പുല്ലൂക്കര പാറാല് മന്സൂര് ആണ് കൊല്ലപ്പെട്ടത്. സംഭവത്തില് ഒരു സിപിഎം പ്രവര്ത്തകന് പിടിയിലായി. കൊലപാതകത്തിന് പിറകില് സിപിഎം ആണെന്ന് ലീഗ് ആരോപിച്ചു.
149-ാം നമ്പര് ബൂത്തിലേക്ക് ഓപ്പണ് വോട്ട് ചെയ്യുന്നതിനായി വോട്ടര്മാരെ കൊണ്ടുവരുന്നതുമായി ബന്ധപ്പെട്ടായിരുന്നു തര്ക്കം. വോട്ടെടുപ്പ് തീര്ന്നതോടെ തര്ക്കം അവസാനിച്ചെന്ന് കരുതിയെങ്കിലും രാത്രി ഏഴരയോടെ വീണ്ടും സംഘര്ഷമുണ്ടായി. രാത്രിയോടെ ഒളിച്ചിരുന്ന ഒരുസംഘം ആളുകള് മന്സൂര് വീട്ടില് നിന്ന് പുറത്തിറങ്ങുന്ന സമയം നോക്കി ബോംബെറിഞ്ഞ് വെട്ടി പരിക്കേല്പ്പിക്കുകയായിരുന്നു. ആശുപത്രിയിലേക്ക് മാറ്റിയെങ്കിലും രാത്രി ഒരു മണിയോടെ മരണം സംഭവിക്കുകയായിരുന്നു.അതേസമയം, പുതുപ്പള്ളി 55-ാം നമ്പര് ബൂത്ത് ഏജന്റ് സോമന് ഇന്നലെ അര്ധരാത്രി വെട്ടേറ്റു.
2021-04-07