കൊച്ചി: കെ സുധാകരന്‍ കെപിസിസി പ്രസിഡന്റ് സ്ഥാനമേറ്റെടുത്തതോടെ മുഖ്യമന്ത്രിക്ക് ഹാലിളകിയെന്നും സുധാകരനെ പിണറായി വിജയന് പേടിയാണെന്നും മുന്‍ പ്രതിപക്ഷനേതാവ് രമേശ് ചെന്നിത്തല. വാക്‌പോരിന് തുടക്കമിട്ടത് മുഖ്യമന്ത്രിയാണ്. അതുകൊണ്ട് തന്നെ അത് അവസാനിപ്പിക്കാനുള്ള ബാധ്യതയും അദ്ദേഹത്തിനാണ്. വിവാദം മുന്നോട്ടു കൊണ്ടു പോകാന്‍ ആഗ്രഹിക്കുന്ന വ്യക്തിയല്ല സുധാകരനെന്നും ചെന്നിത്തല അവകാശപ്പെട്ടു.
കൊവിഡ് അവലോകന യോഗത്തിന് ശേഷം വിളിച്ചു ചേര്‍ക്കുന്ന വാര്‍ത്താ സമ്മേളനത്തെ രാഷ്ട്രീയ പ്രതിയോഗികളെ ആക്രമിക്കാനായി ഉപയോഗിക്കുകയാണെന്നും ചെന്നിത്തല ആരോപിച്ചു. പിണറായി വിജയനെ ബ്രണ്ണന്‍ കോളേജ് പഠനകാലത്ത് ചവിട്ടി വീഴ്ത്തിയെന്ന കെ സുധാകരന്റെ അവകാശവാദത്തിനാണ് മുഖ്യമന്ത്രി മറുപടി പറഞ്ഞത്.