സംവിധായകന് ഐ.വി ശശിയുടെയും സീമയുടെയും മകന് അനി ഐ.വി ശശി ഒരുക്കിയ ഹ്രസ്വചിത്രം മായ യൂടൂബില് വൈറലായിരിക്കുകയാണ്. അനി ഒരുക്കി അടുത്തിടെ ഒടിടി റിലീസായെത്തിയ നിന്നിലാ നിന്നിലായ്ക്ക് ശേഷം പുറത്തുവരുന്ന ചിത്രമാണിത്. അശോക് സെല്വനും പ്രിയ ആനന്ദും പ്രധാനകഥാപാത്രങ്ങളായി എത്തിയ ചിത്രം ഷിക്കാഗോ സൗത്ത് ഏഷ്യന് ഫിലിം ഫെസ്റ്റിവല്, ന്യൂഡല്ഹി ഫിലി ഫെസ്റ്റിവല്, കല്ക്കട്ട ഇന്റര്നാഷണല് ഫിലിം ഫെസ്റ്റിവല്, ഹൈദരാബാദ് ഓള് ലൈറ്റ്സ് ഫിലിം ഫെസ്റ്റില് ഇവിടെയൊക്കെ പ്രദര്ശിപ്പിച്ചിരുന്നു. 2017ലെ ഷിക്കാഗോ സൗത്ത് ഏഷ്യന് ഫിലിം ഫെസ്റ്റിവലില് മികച്ച ഹ്രസ്വചിത്ര(ഫിക്ഷന്)ത്തിനുള്ള പുരസ്കാരം മായയ്ക്ക് ലഭിച്ചിരുന്നു.
നാല് ഫീച്ചര് സിനിമകളുടെ ത്രെഡിന്റെ കൊളാബ്രേഷന് ആണ് മായയെന്നാണ് സംവിധായകന് ചിത്രത്തെ കുറിച്ച് പറയുന്നത്. നിന്നിലാ നിന്നിലാ ആദ്യമെത്തിയെങ്കിലും മായയാണ് അനി ആദ്യമായി സംവിധാനം ചെയ്ത ചിത്രം. അച്ഛന് ഐവി ശശി താന് സംവിധാനം ചെയ്ത മായ മാത്രമേ കണ്ടിട്ടുള്ളുവെന്നും അനി പറയുന്നു.ഞാന് സംവിധായകനാകുമെന്ന് അച്ഛന് പറയുമായിരുന്നുവെന്ന് ചെറുപ്പം മുതല് കേട്ടിട്ടുണ്ട്. ലെന്സിംഗ് ഉള്പ്പെടെയുള്ള ടെക്നിക്കല് കാര്യങ്ങളെ കുറിച്ചൊക്കെ സംസാരിക്കുമായിരുന്നു. ചെറുപ്പം തൊട്ടേ അതിനാല് സിനിമ ആഗ്രഹമുണ്ടായിരുന്നു. സിനിമയില് മാത്രം ആയിരുന്നാല് മതി സംവിധായകന് ആകേണ്ടതില്ല എന്നൊക്കെ ഒരിടയ്ക്ക് തോന്നിയിട്ടുണ്ട്. പക്ഷേ പിന്നെ സംവിധായകന് ആകണമെന്ന് തീരുമാനിക്കുകയായിരുന്നു അനി പറഞ്ഞു.