തിരുവനന്തപുരം: മദ്യവിൽപ്പനശാലകൾക്ക് ഒന്നാം തീയതിയിലുള്ള ഡ്രൈ ഡേ മാറ്റണമെന്ന ആവശ്യവുമായി ബാർ ഉടമകൾ രംഗത്ത്. തീരുമാനം അശാസ്ത്രീയമാണെന്നാണ് ബാർ അസോസിയേഷൻ ഭാരവാഹികൾ സംസ്ഥാന സർക്കാരിനെ അറിയിച്ചത്.
മന്ത്രി എം ബി രാജേഷിന്റെ അധ്യക്ഷതയിലുള്ള യോഗത്തിലാണ് ബാർ ഉടമകൾ ഇക്കാര്യം ആവശ്യപ്പെട്ടത്. മദ്യനയം രുപീകരിക്കുന്നതിന് മുന്നോടിയായാണ് യോഗം ചേർന്നത്. നിലവിലുള്ള ബാർ സമയം മാറ്റണമെന്ന ആവശ്യവും ഭാരവാഹികൾ മുന്നോട്ട് വെച്ചിട്ടുണ്ട്. പ്രവർത്തന സമയം രാവിലെ 8 മണി മുതൽ 11 വരെയാക്കണമെന്നാണ് നിർദ്ദേശം.
ഐടി മേഖലയിലുള്ള ബാറുകൾക്ക് നൈറ്റ് ലൈഫ് ഏർപ്പെടുത്തണമെന്നും ഭാരവാഹികൾ പറഞ്ഞു. മുന്നണിയിലും, സർക്കാരിലും വിഷയം ആലോചിച്ച ശേഷം ഇക്കാര്യത്തിൽ മറുപടി പറയാമെന്നായിരുന്നു മന്ത്രി എം ബി രാജേഷ് യോഗത്തിൽ വ്യക്തമാക്കിയത്.