കണ്ണൂര്: കണ്ണൂരുണ്ടായിട്ടും സി പി എം സംസ്ഥാന സെക്രട്ടറി എം.വി ഗോവിന്ദന് നയിക്കുന്ന ജനകീയ പ്രതിരോധ ജാഥയില് കേന്ദ്രകമ്മിറ്റിയംഗം ഇ പി ജയരാജന് എത്താത്തത് ചര്ച്ചയാവുന്നു. ഇ.പി ഒഴികെയുള്ള നേതാക്കള് എത്തുകയും ചെയ്തു. കാസര്കോടു നിന്നാരംഭിച്ച ജാഥ മുഖ്യമന്ത്രി പിണറായി വിജയനാണ് ഉദ്ഘാടനം ചെയ്തത്. കണ്ണൂരില് എം.വി ഗോവിന്ദന് പ്രസംഗിക്കുമ്ബോള് ജയരാജന് വളപട്ടണത്തെ ഒരു മരണ വീട് സന്ദര്ശിക്കുകയായിരുന്നു.
അതേസമയം, തന്നെ തഴഞ്ഞ് എം വി ഗോവിന്ദനെ പാര്ട്ടി സംസ്ഥാന സെക്രട്ടറിയാക്കിയതില് ഇ പിക്ക് കടുത്ത അതൃപ്തി ഉണ്ടായിരുന്നു. ഇക്കാര്യം പാര്ട്ടി നേതാക്കളോട് തന്നെ അദ്ദേഹം സൂചിപ്പിച്ചതായാണ് റിപ്പോര്ട്ട്. അതിനു ശേഷം പാര്ട്ടി പ്രവര്ത്തനങ്ങളില് അദ്ദേഹം സജീവമല്ല. റിസോര്ട്ട് വിവാദവും പാര്ട്ടി നേതൃത്വത്തോടുള്ള അകല്ച്ചയ്ക്ക് ഇടയാക്കിയിട്ടുണ്ട്. ഇക്കാര്യത്തെക്കുറിച്ച് അന്വേഷിക്കണം എന്നാവശ്യപ്പെട്ടെങ്കിലും കാര്യമുണ്ടായില്ല. കണ്ണൂരില് നിന്നുതന്നെയുള്ള മറ്റൊരു പ്രധാന നേതാവായ പി ജയരാജനാണ് റിസോര്ട്ട് സംബന്ധിച്ച് പാര്ട്ടിയില് വീണ്ടും പരാതി ഉന്നയിച്ചത്.
എന്നാല്, ഇപി ജയരാജന് ജാഥയില് നിന്നും വിട്ടുനില്ക്കേണ്ട സാഹചര്യമില്ലെന്നും, വരും ദിവസങ്ങളില് ഇ പി ജാഥയില് പങ്കെടുക്കുമെന്നും എം വി ഗോവിന്ദന് വ്യക്തമാക്കി.