തിരുവനന്തപുരം: സംസ്ഥാനത്തെ ഭക്ഷ്യ സുരക്ഷയുമായി ബന്ധപ്പെട്ട് ഭക്ഷ്യ സുരക്ഷാ വകുപ്പ് സ്വീകരിച്ച നടപടികളില് അതൃപ്തിയറിയിച്ച് ഹൈക്കോടതി. ഭക്ഷ്യവിഷബാധ സംബന്ധിച്ച വാര്ത്തകളെ തുടര്ന്ന് ഹൈക്കോടതി സ്വമേധയാ എടുത്ത കേസ് ചീഫ് ജസ്റ്റിസ് എസ്. മണികുമാറും ജസ്റ്റിസ് ഷാജി പി ചാലിയും അടങ്ങുന്ന ഡിവിഷന് ബെഞ്ചാണ് തീര്പ്പാക്കിയത്.
അതേസമയം, ഭക്ഷ്യവിഷബാധ തടയാന് ഭക്ഷ്യ സുരക്ഷാ വകുപ്പ് ഈ കാലയളവില് നടത്തിയ പ്രവര്ത്തനങ്ങള് സംബന്ധിച്ച വിശദമായ റിപ്പോര്ട്ട് ഹൈക്കോടതി ആവശ്യപ്പെട്ടതിനെ തുടര്ന്ന് ആരോഗ്യ വകുപ്പ് പ്രിന്സിപ്പല് സെക്രട്ടറിയും ഭക്ഷ്യ സുരക്ഷാ കമ്മീഷണറും നേരത്തെ നല്കിയിരുന്നു. ഇത് പരിശോധിച്ചാണ് കോടതി കേസ് തീര്പ്പാക്കിയത്.
ഭക്ഷ്യവിഷബാധയൊഴിവാക്കാന് ഷവര്മ മാര്ഗനിര്ദേശം പുറപ്പെടുവിക്കുകയും നടപ്പിലാക്കാന് സര്ക്കാര് കര്ശന നിര്ദ്ദേശം നല്കുകയും ചെയ്തിരുന്നു. ആരോഗ്യ വകുപ്പ് മന്ത്രിയുടെ നേതൃത്വത്തില് എന്ഫോഴ്സ്മെന്റ് യോഗം ചേര്ന്ന് പരിശോധനകള് ശക്തമാക്കാനും നിര്ദേശം നല്കി. ഭക്ഷണ സ്ഥാപനങ്ങളിലെ എല്ലാവര്ക്കും ഫോസ്റ്റാക് ട്രെയിനിംഗും കര്ശനമാക്കിയിരുന്നു.