ഉത്തരകൊറിയയുടെ പുതിയ ഹ്വാസോങ്17 ഭൂഖണ്ഡാന്തര ബാലിസ്റ്റിക് മിസൈല് പരീക്ഷണം നടത്തുകയും ആണവായുധങ്ങള് ഉപയോഗിച്ച് യുഎസ് ആണവ ഭീഷണികളെ നേരിടുമെന്ന് പ്രതിജ്ഞയെടുക്കുകയും ചെയ്തതിന് ശേഷം പുതിയ പ്രഖ്യാപനവുമായി ഉത്തരകൊറിയന് ഭരണാധികാരി കിം ജോങ് ഉന്. ലോകത്തിലെ ഏറ്റവും വലിയ ആണവശക്തി സ്വന്തമാക്കുകയെന്നതാണ് ഉത്തരകൊറിയയുടെ ലക്ഷ്യമെന്ന് കിം പ്രഖ്യാപിച്ചു.
‘ലോകത്തെ ഏറ്റവും വലിയ ആണവശക്തിയായി ഉത്തരകൊറിയ വളരുന്നത് രാജ്യത്തിന്റെയും ജനങ്ങളുടെയും അന്തസും പരമാധികാരവും സംരക്ഷിക്കും. ലോകത്തിലെ ഏറ്റവും വലിയ തന്ത്രപരമായ ശക്തിയെ സ്വന്തമാക്കുക എന്നതാണ് ആത്യന്തിക ലക്ഷ്യം. ഈ നൂറ്റാണ്ടില് അഭൂതപൂര്വമായ സമ്പൂര്ണ ശക്തിയാവുമത്. ലോകത്തിലെ ഏറ്റവും ശക്തമായ തന്ത്രപ്രധാന ആയുധം ആണ് ഹ്വാസോങ്-17. ഏറ്റവും ശക്തമായ സൈന്യത്തെ സൃഷ്ടിക്കാനുള്ള ഉത്തരകൊറിയയുടെ ദൃഢനിശ്ചയമാണ് ഹ്വാസോങ്-17ലൂടെ സാധ്യമായത്. ബാലിസ്റ്റിക് മിസൈലുകളില് ന്യൂക്ലിയര് വാര്ഹെഡുകള് ഘടിപ്പിക്കുന്ന സാങ്കേതികവിദ്യയുടെ വികസനത്തില് ഉത്തരകൊറിയന് ശാസ്ത്രജ്ഞര് വലിയ കുതിച്ചുചാട്ടം നടത്തി’- കിം പറഞ്ഞു.
അതേസമയം ഹ്വാസോങ് 17 വികസിപ്പിക്കുന്ന സമയത്ത് കിം തങ്ങളെ ഓരോ കാര്യങ്ങളും ശ്രദ്ധാപൂര്വ്വം പഠിപ്പിച്ചുവെന്ന് ശാസ്ത്രജ്ഞര് പ്രതികരിച്ചു.