ന്യൂഡല്‍ഹി: ഇക്വറ്റോറിയല്‍ ഗിനിയയില്‍ തടവിലകപ്പെട്ട ഇന്ത്യന്‍ നാവികര്‍ ഉള്‍പ്പെട്ട ഹീറോയിക് ഇഡുന്‍ ചരക്ക് കപ്പലിന്റെ നിയന്ത്രണം ഏറ്റെടുത്ത് നൈജീരിയ. ചരക്ക് കപ്പല്‍ കെട്ടിവലിച്ച് നൈജീരിയലിലേക്ക് കൊണ്ടുപോകാനാണ് തീരുമാനം. കഴിഞ്ഞ തിങ്കളാഴ്ച രാത്രി 26 കപ്പല്‍ ജീവനക്കാരെ ഗിനി സേന രണ്ടു സംഘങ്ങളായി തിരിച്ചിരുന്നു. തുടര്‍ന്ന് ഇന്ത്യന്‍ നാവികരെ നൈജീരിയന്‍ യുദ്ധക്കപ്പലിലേക്ക് മാറ്റിയിരുന്നു. ഇന്നലെ രാത്രിയാണ് നൈജീരിയന്‍ കപ്പല്‍ ലൂബ തുറമുഖത്ത് എത്തിയത്. എന്ത് സംഭവിച്ചാലും നൈജീരിയയില്‍ ചെന്ന് നേരിടുമെന്നും ഇന്ത്യന്‍ എംബസി അധികൃതര്‍ എപ്പോള്‍ എത്തുമെന്ന് അറിയില്ലെന്നും കപ്പലിലെ ചീഫ് ഓഫീസറായ സനു ജോസ് വ്യക്തമാക്കി.
അതേസമയം, പതിനഞ്ച് അംഗ നാവികസംഘത്തില്‍ മലയാളിയായ വിജിത്ത്, മില്‍ട്ടന്‍ എന്നിവര്‍ ഉള്‍പ്പെടെ ഒന്‍പത് ഇന്ത്യക്കാരാണ് ഉള്ളത്. കപ്പല്‍ ജീവനക്കാരുടെ മോചനത്തിനായി ഇരുരാജ്യങ്ങളുമായി ചര്‍ച്ച നടത്തുന്നുണ്ടെന്നാണ് വിദേശകാര്യ മന്ത്രാലയം അറിയിച്ചിരുന്നത്. കപ്പല്‍ ജീവനക്കാരെ തടവിലാക്കിയതില്‍ ഇക്വിറ്റോറിയല്‍ ഗിനിക്കെതിരെ കപ്പല്‍ കമ്ബനി ഹീറോയിക് ഇന്‍ഡുന്‍ ജര്‍മ്മനിയിലെ അന്താരാട്രിബ്യൂണലിനെ സമീപിച്ചിരുന്നു. നിയമവിരുദ്ധമായാണ് ജീവനക്കാരെ ഇക്വിറ്റോറിയല്‍ ഗിനി തടഞ്ഞുവെക്കുന്നുവെന്ന് ചൂണ്ടിക്കാട്ടിയാണ് പരാതി നല്‍കിയത്.
അതേസമയം, ജീവനക്കാരെ നൈജീരിയയിലേക്കു വിശദമായ അന്വേഷണത്തിനാണ് കൊണ്ടുപോകുന്നതെന്നും ഇക്കാര്യത്തില്‍ രാജ്യാന്തര സമ്മര്‍ദത്തിനു വഴിപ്പെടില്ലെന്നുമാണു നൈജീരിയന്‍ അധികൃതരുടെ നിലപാട്. ഈ സാഹചര്യത്തിലാണ് ജീവനക്കാരെ മാറ്റാനുള്ള നീക്കം വീണ്ടും നടക്കുന്നത്. അതിനിടെ കപ്പല്‍ കസ്റ്റഡിയില്‍ എടുത്തതില്‍ അഭിമാനമെന്ന് വൈസ് പ്രസിഡന്റ് റ്റെഡിന്‍ഗേമ പ്രതികരിച്ചു. ഇന്നലെ അഞ്ച് മണിക്കൂറാണ് മലയാളികള്‍ അടക്കമുള്ള പതിനഞ്ച് ഇന്ത്യക്കാരെ എക്വറ്റോറിയല്‍ ഗിനി യുദ്ധകപ്പലില്‍ പാര്‍പ്പിച്ചത്. നൈജീരിയയ്ക്ക് കൈമാറാനുള്ള നീക്കമായിരുന്നുവെങ്കിലും സാങ്കേതിക പ്രശ്നമാണെന്ന കാരണം ചൂണ്ടിക്കാട്ടി ജീവനക്കാരെ തിരികെ കരയിലെത്തിച്ചത്.