ന്യൂഡൽഹി: ഡൽഹിയിൽ വായുമലിനീകരണം തടയാൻ കർശന നടപടികളുമായി സർക്കാർ. വ്യവസായങ്ങളും മറ്റുള്ള കച്ചവടസ്ഥാപനങ്ങളും കമ്മീഷൻ ഫോർ എയർ ക്വാളിറ്റി മാനേജ്മെന്റ് (സിഎക്യുഎം) പുറത്തിറക്കിയ മാർഗനിർദേശങ്ങൾ പിന്തുടരണമെന്നാണ് അധികൃതർ വ്യക്തമാക്കിയിട്ടുള്ളത്. ഇത് പരിശോധിക്കുന്നതിനായി 40 ഇൻസ്പെക്ഷൻ, ഫ്ളൈയിംഗ് സ്വകാഡ് തുടങ്ങിയവയ്ക്ക് ചുമതല നൽകിയിട്ടുണ്ട്. കമ്മീഷന്റെ നേതൃത്വത്തിലാണ് ഇൻസ്പെക്ഷൻ, ഫ്ളൈയിംഗ് സ്‌ക്വാഡുകളെ നിയമിച്ചത്.
ഡൽഹിയിലെ വിവിധ ഭാഗങ്ങളിലും നാഷണൽ ക്യാപിറ്റൽ റീജിയണിലും ഇതിന്റെ ഭാഗമായി പരിശോധന നടത്തും. ഏറ്റവുമധികം വായുമലിനീകരണം രേഖപ്പെടുത്തുന്ന എയർ പൊല്യൂഷൻ ഹോട്ട്സ്പോട്ടുകളിലടക്കം പരിശോധന നടത്തുമെന്ന് അധികൃതർ അറിയിച്ചു. 8,580 പ്രദേശങ്ങളിൽ വെള്ളിയാഴ്ച പരിശോധന നടത്തി. 491 നിയമലംഘനങ്ങളാണ് കണ്ടെത്തയത്. ഡൽഹി (110), ഹരിയാന (118), ഉത്തർപ്രദേശ് (211), രാജസ്ഥാൻ (52) എന്നിങ്ങനെയാണ് കണക്കുകൾ. ഗ്രേഡഡ് റെസ്പോൺസ് ആക്ഷൻ പ്ലാൻ എന്ന പേരിലാണ് പരിശോധന നടക്കുന്നത്.
മാർഗനിർദേശങ്ങൾ പിന്തുടരണണെന്ന് സംസ്ഥാന മലിനീകരണ നിയന്ത്രണ ബോർഡിനോടും (എസ്പിസിബി) ഡൽഹി പൊല്യൂഷൻ കൺട്രോൾ കമ്മിറ്റിയോടും (ഡിപിസിസി) കമ്മീഷൻ നിർദ്ദേശം നൽകി.