കണ്ണൂര്: സിപിഎം നേതാവ് കോടിയേരി ബാലകൃഷ്ണന് കണ്ണീരോടെ വിട നല്കി കേരളം. മൃതദേഹം പൂര്ണ്ണ ബഹുമതികളോടെ പയ്യാമ്പലത്ത് സംസ്ക്കരിച്ചു. ഇ കെ നായനാരുടെയും ചടയന് ഗോവിന്ദന്റെയും സ്മൃതി കുടീരങ്ങള്ക്ക് നടുവിലൊരുക്കിയ ചിതക്ക് മക്കളായ ബിനീഷും ബിനോയിയും ചേര്ന്നാണ് തീ കൊളുത്തിയത്. കുടുംബാഗങ്ങള്ക്കും 12 നേതാക്കള്ക്കും മാത്രമാണ് പയ്യാമ്പലത്ത് സംസ്ക്കാരം നടക്കുന്ന സ്ഥലത്തേക്ക് പ്രവേശനമുണ്ടായിരുന്നത്.
അഴീക്കോടന് മന്ദിരത്തില് നിന്ന് പയ്യാമ്പലത്തേക്കുള്ള വിലാപയാത്രയില് കാല്നടയായിട്ടാണ് നേതാക്കളും പ്രവര്ത്തകരും ആംബുലന്സിനെ അനുഗമിച്ചത്. മുഖ്യമന്ത്രിയുടെ നേതൃത്വത്തില് എം എ ബേബി, എം വി ഗോവിന്ദന്, എം വി ജയരാജന്, വിജയരാഘവന്, കെ കെ ശൈലജ, പി കെ ശ്രീമതി അടക്കമുളള മുതിര്ന്ന നേതാക്കള് വിലാപയാത്രയെ അനുഗമിച്ചു. മുഖ്യമന്ത്രിയും യെച്ചൂരിയും കോടിയേരിയുടെ ഭൗതികദേഹം വിലാപയാത്രയില് ചുമലിലേറ്റി.
ഇന്നലെ തലശ്ശേരി ടൗണ് ഹാളിലും കണ്ണൂരിലെ വീട്ടിലും ജില്ലാകമ്മിറ്റി ഓഫീസിലും തങ്ങളുടെ പ്രിയപ്പെട്ട നേതാവിനെ ഒരു നോക്ക് കാണാനും അന്തിമോപചാരം അര്പ്പിക്കാനുമായി ജനസാഗരമാണ് ഒഴുകിയെത്തിയത്. ഭാര്യ വിനോദിനിയും മക്കളും പൊട്ടിക്കരഞ്ഞു കൊണ്ടാണ് വീട്ടില് നിന്ന് കോടിയേരിക്ക് അവസാന യാത്രമൊഴിയേകിയത്. ഈങ്ങയില് പീടികയിലെ വീട്ടില് നിന്ന് കണ്ണൂരിലേയ്ക്കുള്ള വിലാപയാത്രയില് വഴിക്ക് ഇരുവശവും അന്ത്യാഭിവാദ്യവുമായി ജനം തടിച്ചുകൂടിയിരുന്നു.