കണ്ണൂര് സര്വകലാശാല മലയാളം അസോസിയേറ്റ് പ്രൊഫസര് തസ്തികയില് കെ.കെ.രാഗേഷിന്റെ ഭാര്യ പ്രിയ വര്ഗീസിനെ നിയമിച്ചതിലുള്ള സ്റ്റേ ഹൈക്കോടതി നീട്ടി. നിയമനത്തിനുള്ള സ്റ്റേ ഉത്തരവ് ഒക്ടോബര് 20 വരെ ദീര്ഘിപ്പിച്ചു കൊണ്ട് ജസ്റ്റിസ് ദേവന് രാമചന്ദ്രനാണ് ഉത്തരവിട്ടത്. പ്രിയ വര്ഗീസിന് അസോസിയേറ്റ് പ്രൊഫസ്സറാകാനുള്ള നിശ്ചിത അധ്യാപന പരിചയമില്ലെന്നും, ഗവേഷണകാലം അധ്യാപന പരിചയമായി കണക്കുകൂട്ടാനാവില്ലെന്നും യൂ ജി സി രേഖാമൂലം അറിയിച്ചു.
സ്റ്റുഡന്റസ് സര്വീസ് ഡയറക്ടര് തസ്തിക അധ്യാപനവുമായോ ഗവേഷണവുമായോ ബന്ധപ്പെട്ടതാണെങ്കില് മാത്രമേ അധ്യാപന പരിചയമായി കണക്കുകൂട്ടാന് പാടുള്ളൂ. സര്വ്വകലാശാല ചട്ടങ്ങളും സര്ക്കാര് ഉത്തരവും പ്രകാരം സ്റ്റുഡന്റസ് സര്വീസ് ഡയറക്ടര് തസ്തിക അനധ്യാപക വിഭാഗമാണ്. ഗവേഷണകാലവും,സ്റ്റുഡന്റസ് സര്വീസ് ഡയറക്റ്റര് കാലയളവും ഒഴിവായാല്, എട്ടു വര്ഷത്തെ അധ്യാപന പരിചയത്തിന് പകരം ഹര്ജിയില് പരാതിക്കാരന് ഉന്നയിച്ചിട്ടുള്ള മൂന്നര വര്ഷത്തെ അധ്യാപന പരിചയം മാത്രമാണ് പ്രിയവര്ഗീസിനുള്ളത്.
അതേസമയം, കേസില് എതിര് സത്യവാങ്മൂലം നല്കാന് പ്രിയാ വര്ഗീസിന് കോടതി സമയം അനുവദിച്ചിട്ടുണ്ട്. അഭിമുഖത്തില് പ്രിയക്ക് ഒന്നാം റാങ്ക് നല്കിയ ഉത്തരവിനെതിരെ രണ്ടാം റാങ്കുകാരനായ ചങ്ങനാശേരി എസ്.ബി. കോളേജ് അധ്യാപകന് ഡോ. ജോസഫ് സ്കറിയ നല്കിയ ഹര്ജിലാണ് ഇപ്പോഴത്തെ നടപടി.