ന്യൂഡല്ഹി: പോപ്പുലര് ഫ്രണ്ട് ഓഫ് ഇന്ത്യക്കൊപ്പം റിഹാബ് ഇന്ത്യ ഫൗണ്ടേഷന്, ക്യാമ്പസ് ഫ്രണ്ട് ഓഫ് ഇന്ത്യ, ഓള് ഇന്ത്യ ഇമാംസ് കൗണ്സില്, നാഷണല് കോണ്ഫഡറേഷന് ഓഫ് ഹ്യൂമന് റൈറ്റ്സ് ഓര്ഗനൈസേഷന്, നാഷണല് വിമന്സ് ഫ്രണ്ട്, ജൂനിയര് ഫ്രണ്ട്, എംപവര് ഇന്ത്യ ഫൗണ്ടേഷന്, റിഹാബ് ഫൗണ്ടേഷന് കേരള എന്നീ എട്ട് അനുബന്ധ സംഘടനകളെ കൂടി നിരോധിച്ച് കേന്ദ്രം. അഞ്ച് വര്ഷത്തേക്ക് തന്നെയാണ് ഈ സംഘടനകള്ക്കും നിരോധനമേര്പ്പെടുത്തിയിട്ടുള്ളത്.
അതേസമയം, രണ്ട് തവണയാണ് പോപ്പുലര് ഫ്രണ്ട് ഓഫീസുകളിലും നേതാക്കളുടെ വീടുകളിലും റെയ്ഡ് നടന്നത്. കേരളത്തില് നടത്തിയ എന്ഐഎ റെയ്ഡില് സംസ്ഥാന നേതാക്കളടക്കമുള്ളവര്ക്കെതിരെ കേസെടുക്കുകയും അറസ്റ്റ് ചെയ്യുകയും ചെയ്തിരുന്നു. സെപ്റ്റംബര് 22ന് ദേശീയ അന്വേഷണ ഏജന്സി രാജ്യവ്യാപകമായി നടത്തിയ റെയ്ഡില് 106 പേര് അറസ്റ്റിലായിരുന്നു. കേരളത്തില് നിന്ന് മാത്രം 19 നേതാക്കളാണ് അറസ്റ്റിലായത്. രണ്ടാം ഘട്ട പരിശോധനയില് ആകെ 247 പേരാണ് വിവിധ സംസ്ഥാനങ്ങളില് നിന്നായി അറസ്റ്റിലായത്.
രാജ്യസുരക്ഷ, ക്രമസമാധാനം എന്നിവ കണക്കിലെടുത്താണ് പോപ്പുലര് ഫ്രണ്ടിന് നിരോധനം ഏര്പ്പെടുത്തിയതെന്ന് കേന്ദ്രം ഉത്തരവില് വ്യക്തമാക്കി. രാജ്യവ്യാപക റെയ്ഡിന് പിന്നാലെ പിഎഫ്ഐയെ നിരോധനത്തിലേക്കാണ് കേന്ദ്ര സര്ക്കാര് നീങ്ങുന്നതെന്നുള്ള സൂചനകള് നേരത്തെ പുറത്ത് വന്നിരുന്നു.