ന്യൂഡല്‍ഹി: രാഹുല്‍ ഗാന്ധി നയിക്കുന്ന കോണ്‍ഗ്രസിന്റെ ‘ഭാരത് ജോഡോ യാത്ര’ കന്യാകുമാരിയില്‍ കഴിഞ്ഞ ദിവസം ആരംഭിച്ച് തമിഴ്‌നാട്ടിലൂടെ സഞ്ചരിച്ചു കൊണ്ടിരിക്കുകയാണ്. വെയിലും മഴയും മഞ്ഞുമെല്ലാം താണ്ടിയുള്ള യാത്ര ഓരോ ദിവസവും പൂര്‍ത്തിയാകുമ്പോഴേക്കും രാത്രിയാവും. രാഹുല്‍ ഗാന്ധി ഉള്‍പ്പെടെ 119 സ്ഥിരം യാത്രികരും, കൂടാതെ അതിഥി യാത്രികരായി വേറെയും. സ്ഥിരയാത്രികരും മറ്റുമായി 230 പേര്‍ക്ക് എല്ലാ ദിവസവും താമസിക്കാന്‍ കോണ്‍ഗ്രസ് തന്നെ സംവിധാനം ഏര്‍പ്പെടുത്തിയിട്ടുണ്ട്.
അതേസമയം, ട്രക്കുകളില്‍ ഒരുക്കിയ കണ്ടെയ്‌നറുകളിലാണ് രാഹുല്‍ ഗാന്ധി ഉള്‍പ്പെടെ സ്ഥിരയാത്രികര്‍ രാത്രി തങ്ങുന്നത്. ട്രെയിനിലെ ബര്‍ത്തുകള്‍ക്ക് സമാനമായ സംവിധാനം. ശുചിമുറികളും ഇത്തരം കണ്ടെയ്‌നറുകളില്‍ തന്നെയുണ്ട്. യാത്രയോടൊപ്പം തന്നെ കശ്മീര്‍ വരെ ഈ 60 കണ്ടെയ്‌നറുകളും സഞ്ചരിക്കും. ഓരോ ദിവസവും രാത്രി ക്യാമ്പ് ചെയ്യുന്ന സ്ഥലത്ത് രണ്ട് ഏക്കറോളം ഇടം ഈ കണ്ടൈനറുകള്‍ക്കായി മാറ്റിവയ്ക്കും. ഭക്ഷണം കോണ്‍ഗ്രസ് പ്രവര്‍ത്തകര്‍ ഒരുക്കി നല്‍കും.
12 സംസ്ഥാനങ്ങളിലൂടെ, രണ്ട് കേന്ദ്രഭരണ പ്രദേശങ്ങളിലൂടെ സഞ്ചരിച്ച് 2023 ജനുവരി 23-ന് ഭാരത് ജോഡോ യാത്ര കശ്മീരിലാണ് സമാപിക്കുക.