തൃശ്ശൂര്‍: കൊവിഡ് വ്യാപനം കുറഞ്ഞ സാഹചര്യത്തില്‍ ഈ അധ്യയന വര്‍ഷം സ്‌കൂള്‍ വാര്‍ഷിക പരീക്ഷ നടത്താന്‍ സംസ്ഥാന സര്‍ക്കാരിന്റെ നീക്കം. ഈ മാസം 22 മുതല്‍ 30 വരെ പരീക്ഷ നടത്താന്‍ ഏകദേശ ധാരണയുണ്ടെങ്കിലും ഇക്കാര്യത്തില്‍ വിദ്യാഭ്യാസ വകുപ്പ് അന്തിമ തീരുമാനമെടുത്തിട്ടില്ല.
അഞ്ചു മുതല്‍ ഒമ്പത് വരെയുള്ള ക്ലാസുകളിലെ വിദ്യാര്‍ത്ഥികള്‍ക്ക് മാത്രം വാര്‍ഷിക പരീക്ഷ നടത്താനാണ് വിദ്യാഭ്യാസ വകുപ്പിന്റെ തീരുമാനം. ഒന്നു മുതല്‍ നാലു വരെ ക്ലാസുകള്‍ക്ക് പരീക്ഷക്ക് പകരം പഠന നേട്ടം വിലയിരുത്തുന്ന വര്‍ക്ക് ഷീറ്റുകള്‍ തയാറാക്കി നല്‍കും. 22നകം സ്‌കൂളുകളില്‍ ഇവ വിതരണം ചെയ്യണമെന്ന് സമഗ്രശിക്ഷ കേരളയ്ക്ക് നിര്‍ദ്ദേശം നല്‍കിയിട്ടുണ്ട്. അഞ്ചു മുതല്‍ ഏഴു വരെ ക്ലാസുകളുടെ ചോദ്യപേപ്പര്‍ തയാറാക്കുന്ന ചുമതലയും എസ്എസ്‌കെക്കാണ്. എട്ട്, ഒമ്പത് ക്ലാസുകളിലെ പരീക്ഷക്കുള്ള ചോദ്യപേപ്പര്‍ തയ്യാറാക്കല്‍ എസ്സിഇആര്‍ടിയുടെ മേല്‍നോട്ടത്തിലാണ് നടക്കുന്നത്. എസ്എസ്എല്‍സി, ഹയര്‍ സെക്കണ്ടറി, വൊക്കേഷണല്‍ ഹയര്‍ സെക്കണ്ടറി മാതൃകാ പരീക്ഷകള്‍ ഈ മാസം 16ന് തുടങ്ങി 21ന് അവസാനിക്കും. ഈ സാഹചര്യത്തില്‍ ഈ മാസം 22നും 30നും ഇടയില്‍ സ്‌കൂള്‍ വാര്‍ഷിക പരീക്ഷ നടത്താനുള്ള ശ്രമങ്ങളാണ് നടക്കുന്നത്.
എസ്എസ്എല്‍സിക്കാര്‍ക്ക് 16 മുതല്‍ രാവിലെയും ഉച്ചയ്ക്കുമായാണ് മോഡല്‍ പരീക്ഷ നടത്തുക. ടൈം ടേബിളില്‍ ഐടി പരീക്ഷ ഉള്‍പ്പെടുത്തിയിട്ടില്ല. എസ്എസ്എല്‍സി ഒന്നാം ഭാഷ, ഫിസിക്സ് വിഷയങ്ങള്‍ രാവിലെ 9.45 മുതല്‍ 11.30 വരെയും ഇംഗ്ലീഷ്, സോഷ്യല്‍ സയന്‍സ്, കണക്ക് എന്നീ വിഷയങ്ങള്‍ക്ക് രാവിലെ 9.45 മുതല്‍ 12.30 വരെയുമാണ് പരീക്ഷ. രണ്ടാം ഭാഷ, ഹിന്ദി, കെമിസ്ട്രി, ബയോളജി എന്നീ വിഷയങ്ങള്‍ ഉച്ചയ്ക്ക് രണ്ടു മുതല്‍ 3.45 വരെയാണ് നടത്തുക. പ്ലസ് വണ്‍ പരീക്ഷ ജൂണ്‍ അവസാനം നടത്താനാണ് തീരുമാനം. എസ്എസ്എല്‍സി, പ്ലസ് ടു പരീക്ഷകള്‍ ഏപ്രില്‍ അവസാനം പൂര്‍ത്തിയായാല്‍ മൂല്യനിര്‍ണയത്തിന് മൂന്നാഴ്ച വേണ്ടിവരും. ഈ സാഹചര്യത്തില്‍ ഈ അധ്യയന വര്‍ഷം പ്ലസ് വണ്‍ പരീക്ഷ നടത്തുന്നത് പ്രായോഗികമല്ലെന്നാണ് അധികൃതരുടെ വിലയിരുത്തല്‍. ഇതേ തുടര്‍ന്നാണ് പ്ലസ് വണ്‍ പരീക്ഷ ജൂണിലേക്ക് മാറ്റുന്നത്. സ്‌കൂള്‍ വാര്‍ഷിക പരീക്ഷ മാര്‍ച്ചില്‍ തന്നെ പൂര്‍ത്തിയാക്കി ഒന്നു മുതല്‍ ഒമ്പതു വരെ ക്ലാസുകള്‍ക്ക് ഏപ്രില്‍, മെയ് മാസങ്ങളില്‍ മധ്യവേനലവധി നല്‍കാനാണ് സര്‍ക്കാരിന്റെ തീരുമാനം. എസ്എസ്എല്‍സി ബോര്‍ഡ് പരീക്ഷ ഈമാസം 31ന് ആരംഭിച്ച് ഏപ്രില്‍ 29നാണ് അവസാനിക്കുക. രണ്ടാം വര്‍ഷ ഹയര്‍ സെക്കന്‍ഡറി-വൊക്കേഷണല്‍ ഹയര്‍സെക്കന്‍ഡറി പരീക്ഷകള്‍ ഈ മാസം 30 മുതല്‍ ഏപ്രില്‍ 22 വരെയും നടക്കും.