മലപ്പുറം: 1.14 കോടിയുടെ വായ്പ തിരിച്ചടവ് മുടങ്ങിയതിനാല്‍, പി വി അന്‍വര്‍ എംഎല്‍എയുടെ ഒരു ഏക്കര്‍ ഭൂമി ജപ്തി ചെയ്യാനൊരുങ്ങി ആക്‌സിസ് ബാങ്ക്. ബാങ്ക് അന്‍വറിന് ജപ്തി നോട്ടീസ് അയക്കുകയും പത്രപ്പരസ്യം നല്‍കുകയും ചെയ്തിട്ടുണ്ട്.
അതേസമയം മലപ്പുറം ചീങ്കണ്ണിപ്പാലയില്‍ അന്‍വറിന്റെ ഭാര്യാപിതാവിന്റെ പേരിലുളള വസ്തുവില്‍ അനധികൃമായി നിര്‍മിച്ച റോപ്‌വേ പൊളിച്ചുനീക്കുന്ന നടപടി ഇന്നും തുടരും. റോപ് വേയും കോണ്‍ക്രീറ്റ് തുണുകളുമാണ് പൊളിച്ചു നീക്കുക. തദ്ദേശസ്വയംഭരണ സ്ഥാപനങ്ങള്‍ക്കായുളള ഓംബുഡ്‌സ്മാന്റെ നിര്‍ദ്ദേശാനുസരണമാണ് നടപടി. ഊര്‍ങ്ങാട്ടിരി പഞ്ചായത്ത് 1,47000 രൂപ ചെലവിട്ടാണ് ഈ പ്രവൃത്തി ചെയ്യുന്നത്.
എന്നാല്‍, ഒരു റോപ് വേ പോയാല്‍ രോമം പോകുന്നത് പോലെയെന്ന് പി വി അന്‍വര്‍ ഇന്നലെ ഫേസ്ബുക്കിലൂടെ പ്രതികരിച്ചു. അന്‍വറിന്റെ അനധികൃത നിര്‍മ്മാണം അധികാരത്തിന്റേയും സ്വാധീനത്തിന്റേയും പിന്‍ ബലത്തിലെന്ന് പരാതിക്കാരനായ എം പി വിനോദ് നേരത്തെ പറഞ്ഞിരുന്നു. ഒരു ഭീഷണിക്കും വഴങ്ങില്ലെന്നും പരാതികളുമായി മുന്നോട്ടു പോകുമെന്നും അദ്ദേഹം കൂട്ടിച്ചേര്‍ത്തു.