അഹമ്മദാബാദ്: വിഖ്യാത സംഗീതജ്ഞയും ഇന്ത്യയുടെ വാനമ്പാടിയുമായ ലതാ മങ്കേഷ്ക്കറിന് ആദരാഞ്ജലിയര്പ്പിച്ച് ഇന്ത്യന് ക്രിക്കറ്റ് ടീം. അഹമ്മദാബാദില് നടക്കുന്ന വെസ്റ്റിന്ഡീസിനെതിരായ ആദ്യ ഏകദിനത്തിലാണ് ഇന്ത്യന് താരങ്ങള് ലതാജിക്ക് ആദരാഞ്ജലിയര്പ്പിച്ച് രംഗത്തെത്തിയത്. മത്സരത്തിന് മുമ്പായി ക്യാപ്ടന് രോഹിത് ശര്മ്മയുടെയും വിരാട് കൊഹ്ലിയുടെയും നേതൃത്വത്തില് ഗ്രൗണ്ടില് അണിനിരന്ന ഇന്ത്യന് താരങ്ങള് ഒരു മിനിട്ട് മൗനം ആചരിച്ചു. രാഹുല് ദ്രാവിഡ് ഉള്പ്പെടെയുള്ള ഇന്ത്യയുടെ പരിശീലക സംഘവും ബൗണ്ടറി ലൈനിന് പുറത്ത് മൗനം ആചരിച്ചു. കൈയില് കറുത്ത ആംബാന്ഡ് കെട്ടിയാണ് ഇന്ത്യന് ടീമംഗങ്ങള് കളത്തിലിറങ്ങിയത്.
ലതാ മങ്കേഷ്ക്കര് വലിയൊരു ക്രിക്കറ്റ് ആരാധികയായിരുന്നെന്നും എന്നും ഇന്ത്യന് ടീമിനെ പിന്തുണക്കുന്നതില് മുന്നിരയില് തന്നെ ഉണ്ടായിരുന്നെന്ന്ബി സി സി ഐ ട്വീറ്റ് ചെയ്തു. ഏറെനാളായി മുംബൈയിലെ സ്വകാര്യ ആശുപത്രിയില് വെന്റിലേറ്ററില് കഴിയുകയായിരുന്നു ലതാജി.