കൊച്ചി: കൊച്ചി മെട്രോ എം.ജി റോഡ് സ്റ്റേഷനിൽ ഗെയിമിംഗ് സ്റ്റേഷൻ ആരംഭിച്ചു. പ്രശസ്ത ബാലതാരം വൃദ്ധി വിശാലാണ് ഗെയിമിംഗ് സ്റ്റേഷൻ ഉദ്ഘാടനം ചെയ്തത്. കാർഗെയിം, ജോക്കർ ഗെയിം, ടോയ് പിക്കിംഗ് ഗെയിം തുടങ്ങിയ സവിശേഷമായ ഇനങ്ങളാണ് ഗെയിമിംഗ് സ്റ്റേഷനിൽ ഉള്ളത്.
സ്റ്റേഷനിലെ കസ്റ്റമർ കെയറിൽ പണം അടച്ച് ഗെയിമുകൾ കളിക്കാം. 50 രൂപയാണ് ടോയ് പിക്കിംഗ് ഗെയിം ചാർജ്. രണ്ട് കോയിൻ ലഭിക്കും. ഇതുപയോഗിച്ച് കളിച്ച് ഇഷ്ടമുള്ള ടോയ് സ്വന്തമാക്കാം.
ജോക്കർ ഗെയിമിന് രണ്ട് ബോളുകൾക്ക് 10 രൂപയാണ് നിരക്ക്. കളിക്കുമ്പോൾ 10 പോയിന്റുകൾ കിട്ടിയാൽ ഗിഫ്റ്റ് കിട്ടും. കാർ റേസിന് 50 രൂപയാണ് നിരക്ക്. അഞ്ച് ലാപ് വരെ ഇതുപയോഗിച്ച് കളിക്കാം. ചടങ്ങിൽ കെ.എം.ആർ.എൽ ജനറൽ മാനേജർ സി. നിരീഷ്, സീനിയർ ഡെപ്യൂട്ടി ജനറൽ മാനേജർ സുമി നടരാജൻ തുടങ്ങിയവർ സംബന്ധിച്ചു. ഗെയിമിംഗ് സെന്റർ കൂടി പ്രവർത്തനം തുടങ്ങിയതോടെ എം.ജി റോഡ് സ്റ്റേഷനിൽ ആളുകൾക്ക് സവിശേഷമായ യാത്ര അനുഭവമാണ് നൽകുന്നത്.
പടികൾ കയറുമ്പോൾ സംഗീതം പൊഴിക്കുന്ന മ്യൂസിക് സ്റ്റെയർ, കാലുകൊണ്ട് ചവിട്ട് പ്രവർത്തിപ്പിക്കാവുന്ന മൊബൈൽ ചാർജിംഗ് സൗകര്യം, സെൽഫി കോർണർ തുടങ്ങിയവയ്ക്ക് ഒപ്പമാണ് കുട്ടികൾക്ക് വിനോദത്തിനുള്ള സൗകര്യവുമൊരുക്കിയിരിക്കുന്നത്.