തിരുവനന്തപുരം: സംസ്ഥാന വിദ്യാഭ്യാസ ഗവേഷണ പരിശീലന സമിതി (എസ്.സി.ഇ.ആര്.ടി) കേരളത്തിലെ സ്കൂള്, ഡയറ്റ് അധ്യാപകരില് നിന്ന് ഗവേഷണ പ്രോജക്ടുകള് ക്ഷണിച്ചു. പ്രീ പ്രൈമറി മുതല് ഹയര്സെക്കന്ഡറി വരെ വിവിധ തലങ്ങളിലെ സ്കൂള് വിദ്യാഭ്യാസവുമായി ബന്ധപ്പെട്ട ഗവേഷണ പ്രോജക്ടുകള് സമര്പ്പിക്കാം. തിരഞ്ഞെടുക്കപ്പെടുന്ന പ്രോജക്ടുകള്ക്ക് സാമ്പത്തിക സഹായവും (പരമാവധി മൂന്ന് ലക്ഷം രൂപ) അക്കാദമിക പിന്തുണയും എസ്.സി.ഇ.ആര്.ടി നല്കും.
വിശദമായ പ്രോജക്ട് രൂപരേഖയും ആവശ്യമായ സാമ്പത്തിക സഹായവും സംബന്ധിച്ച വിവരങ്ങള് ഉള്പ്പെടുത്തിയ പ്രൊപ്പോസലുകള് സ്കൂള് മേലധികാരിയുടെ സാക്ഷ്യപത്രത്തോടെ സമര്പ്പിക്കുക ഒറ്റയ്ക്കോ ഏതാനും പേര്ക്ക് കൂട്ടായോ പ്രോജക്ട് ഏറ്റെടുക്കാം.
വ്യക്തിപരമായ വിവരങ്ങളടക്കം ഇംഗ്ലീഷിലോ മലയാളത്തിലോ തയാറാക്കിയ അപേക്ഷകള് ഫെബ്രുവരി 10 ന് മുന്പ് scertresearch@gmail.com ലേക്ക് അയയ്ക്കണം. വിശദാംശങ്ങള്ക്ക്: www.scert.gov.in. സന്ദര്ശിക്കുക.