തിരുവനന്തപുരം: സംസ്ഥാനത്ത് കൊവിഡ് പരിശോധനാ ഫലം വൈകാതിരിക്കാന് ജില്ലാതല ടീമിനെ നിയോഗിച്ചതായി ആരോഗ്യമന്ത്രി വീണാ ജോര്ജ്. പരിശോധന അടിസ്ഥാനമാക്കി സര്വയലന്സ് ശക്തമാക്കും. ഹോസ്പിറ്റല് സര്വയലന്സ്, ട്രാവല് സര്വയലന്സ്, കമ്മ്യൂണിറ്റി സര്വയലന്സ് എന്നിവയ്ക്ക് പ്രാധാന്യം നല്കും. വിദഗ്ധ ഗൃഹ പരിചരണം ഉറപ്പാക്കാന് നടപടികള് സ്വീകരിക്കാനും മന്ത്രി നിര്ദേശം നല്കി.
കൊവിഡ് സര്വയലന്സ് കമ്മിറ്റിയില് സ്വകാര്യ ആശുപത്രികളെയും ഉള്പ്പെടുത്തി. സര്വയലന്സ് കമ്മിറ്റി കൊവിഡ് പൊസിറ്റിവ് ആയവരുടെ വിവരങ്ങള് തദ്ദേശ സ്ഥാപനങ്ങള്ക്ക് നല്കും. ഹോസ്പിറ്റല് മാനേജ്മെന്റ് കമ്മിറ്റികളും ശക്തിപ്പെടുത്തി. കൊവിഡ് രോഗികളുടെ വാക്സിനേഷന് അവസ്ഥ, ചികിത്സ, ഡിസ്ചാര്ജ് അടക്കം ഈ കമ്മിറ്റികള് നിരീക്ഷിക്കും. കൂടുതല് ഫീല്ഡ് ആശുപത്രികള് സജ്ജമാക്കും. കൊവിഡ് അതിതീവ്ര വ്യാപനത്തിന്റെ പശ്ചാത്തലത്തില് മന്ത്രിയുടെ നേതൃത്വത്തില് സ്റ്റേറ്റ് റാപ്പിഡ് റെസ്പോണ്സ് ടീമിന്റെ അടിയന്തര യോഗം ഇന്ന് ചേരുകയും 12 സംസ്ഥാനതല ആര്ആര്ടി കമ്മിറ്റികളുടെ പ്രവര്ത്തനങ്ങള് വിലയിരുത്തുകയും ചെയ്തു.
രോഗികളുടെ എണ്ണം വര്ധിക്കുന്നതിനനുസരിച്ച് കൂടുതല് ഫീല്ഡ് ആശുപത്രികള് സജ്ജമാക്കുന്നതാണെന്നും മന്ത്രി വ്യക്തമാക്കി. സുരക്ഷാ ഉപകരണങ്ങള്ക്കും മരുന്നുകള്ക്കും ക്ഷാമമില്ല. ഓക്സിജന് ശേഖരമുണ്ടെങ്കിലും സാഹചര്യം നിരന്തരം നിരീക്ഷിക്കും. കൂടുതല് ആംബുലന്സ് സൗകര്യം സജ്ജമാക്കും. സംസ്ഥാനത്ത് വാക്സിന് സ്റ്റോക്കുണ്ട്. പോസ്റ്റ് കൊവിഡ് മാനേജ്മെന്റ് ശക്തിപ്പെടുത്തും. പ്രാഥമികാരോഗ്യ കേന്ദ്രങ്ങള് മുതല് മെഡിക്കല് കോളേജുകള്വരെ പോസ്റ്റ് കൊവിഡ് ചികിത്സ ലഭ്യമാണ്. രോഗികളുടെ എണ്ണം കൂടിയതിനാല് കൂടുതല് ഡോക്ടര്മാരെ നിയമിക്കുന്നതാണെന്നും കാത്തിരിപ്പ് സമയം ഒരു മിനിറ്റില് താഴെയാക്കുമെന്നും ആരോഗ്യമന്ത്രി ഉറപ്പ് നല്കി.