ലഖ്നൗ: നിയമസഭാ തിരഞ്ഞെടുപ്പില് ഉത്തര്പ്രദേശില് മത്സരിക്കാനൊരുങ്ങി സമാജ് വാദി പാര്ട്ടി അധ്യക്ഷന് അഖിലേഷ് യാദവ്. എന്നാല്, ഇത്തവണ മത്സരിക്കാന് ഉദ്ദേശിക്കുന്നില്ലെന്നും എല്ലാ മണ്ഡലങ്ങളിലും ശ്രദ്ധ കേന്ദ്രീകരിക്കാനാണ് താല്പര്യമെന്നുമായിരുന്നു അഖിലേഷ് നേരത്തെ പറഞ്ഞിരുന്നത്. പക്ഷേ ഏത് സീറ്റില്നിന്നാണ് അഖിലേഷ് ജനവിധി തേടുക എന്ന കാര്യത്തില് ഇതുവരെ തീരുമാനമായിട്ടില്ല.
യു.പിയില് നിലവിലെ മുഖ്യമന്ത്രി യോഗി ആദിത്യനാഥ് മത്സരിക്കാന് തീരുമാനിച്ചതോടെ അഖിലേഷും രംഗത്തിറങ്ങാന് നിര്ബന്ധിതനാവുകയായിരുന്നു എന്നാണ് സൂചന. നിയമസഭാ തിരഞ്ഞെടുപ്പില് ആദ്യമായി ജനവിധി തേടാനൊരുങ്ങുന്ന യോഗി, കിഴക്കന് ഉത്തര് പ്രദേശിലെ ഗോരഖ്പുര് സദറില്നിന്നാണ് മത്സരിക്കുന്നത്. കിഴക്കന് ഉത്തര് പ്രദേശിലെ അസംഗഢില് നിന്നുള്ള എം.പിയാണ് നിലവില് അഖിലേഷ് യാദവ്. അദ്ദേഹം നിയമസഭാ തിരഞ്ഞെടുപ്പില് മത്സരിക്കുന്നത് ഇതാദ്യമാണ്. മുന്പ് മുഖ്യമന്ത്രിയായിട്ടുണ്ടെങ്കിലും ലെജിസ്ലേറ്റീവ് കൗണ്സില് അംഗത്വത്തിലൂടെയാണ് അദ്ദേഹം അന്ന് നിയമസഭയിലെത്തിയത്.
അതേസമയം, അഖിലേഷിന്റെ ഇളയസഹോദരന് പ്രതീകിന്റെ ഭാര്യയുമായ അപര്ണാ യാദവ് ബിജെപി അംഗത്വം സ്വീകരിച്ചു. 2017 ഉത്തര് പ്രദേശ് നിയമസഭാ തിരഞ്ഞെടുപ്പില് അപര്ണാ യാദവ് ജനവിധി തേടിയിരുന്നു.