തിരുവനന്തപുരം: കൊവിഡ് വ്യാപനത്തില് നിയന്ത്രണങ്ങള് കടുപ്പിച്ച് തിരുവനന്തപുരം ജില്ലാ ഭരണകൂടം. ജില്ലയില് പൊതുയോഗങ്ങളും സാമൂഹിക ഒത്തുചേരലുകളും നിരോധിച്ചുകൊണ്ട് ജില്ലാ കളക്ടര് ഉത്തരവിറക്കി. കല്യാണങ്ങള്ക്കും മരണാനന്തരചടങ്ങുകള്ക്കും പങ്കെടുക്കാവുന്ന ആളുകളുടെ എണ്ണം 50 ആയി കുറച്ചു. നേരത്തേ നിശ്ചയിച്ച ആളുകള് കൂടിയുള്ള യോഗങ്ങള് മാറ്റിവെക്കാനും ഉത്തരവുണ്ട്.
നഗരത്തിലെ മാളുകളിലും വ്യാപാര സ്ഥാപനങ്ങളിലും ജനത്തിരക്ക് അനുവദിക്കില്ല. വ്യാപാര സ്ഥാപനങ്ങളില് 25 സ്ക്വയര് ഫീറ്റിന് ഒരാളെന്ന നിലയില് നിശ്ചയിച്ച് മാത്രമേ ആളുകളെ പ്രവേശിപ്പിക്കുകയുള്ളൂ. സിറ്റി, റൂറല് ജില്ലാ പോലീസ് മേധാവിമാര്ക്കും കര്ശന നിര്ദ്ദേശം നല്കിയിട്ടുണ്ട്.
സര്ക്കാര്, അര്ദ്ധ സര്ക്കാര്, പൊതുമേഖലാ സ്ഥാപനങ്ങള്, സഹകരണ സ്ഥാപനങ്ങള് എന്നിവിടങ്ങളിലേതുള്പ്പെടെ എല്ലാ ഔദ്യോഗിക പരിപാടികളും ചടങ്ങുകളും ഓണ്ലൈന് ആയി നടത്താനും നിര്ദ്ദേശമുണ്ട്. വിദ്യാഭ്യാസ സ്ഥാപനങ്ങളില് ക്ലസ്റ്ററുകള് രൂപപ്പെട്ടാല് 15 ദിവസത്തേക്ക് സ്ഥാപനങ്ങള് അടച്ചിടാനും ഉത്തരവില് പറയുന്നു.