മുംബൈ: മുബൈയിൽ ഭീകരാക്രമണം നടക്കാൻ സാധ്യതയുണ്ടെന്ന് മുന്നറിയിപ്പ്. പുതുവർഷത്തലേന്ന് മുംബൈയിൽ ഭീകരാക്രമണം നടന്നേക്കുമെന്നാണ് മുന്നറിയിപ്പ് ലഭിച്ചിരിക്കുന്നത്. ഖാലിസ്ഥാൻ ഭീകരർ മുംബൈ ലക്ഷ്യമിട്ട് ആക്രമണം നടത്താൻ പദ്ധതി തയ്യാറാക്കുന്നതായി രഹസ്യാന്വേഷണ ഏജൻസികൾ നൽകുന്ന വിവരം. മുന്നറിയിപ്പിന്റെ പശ്ചാത്തലത്തിൽ മുംബൈയിൽ സുരക്ഷാ നടപടികൾ കർശനമാക്കി.
ജാഗ്രതാ നിർദ്ദേശത്തെ തുടർന്ന് മുംബൈ, ദാദർ, ബാന്ദ്ര, ചർച്ച്ഗേറ്റ്, സി.എസ്.എം.പി, കുർള റെയിൽവേ സ്റ്റേഷനുകളിൽ കടുത്ത നിരീക്ഷണം ഏർപ്പെടുത്തിയിട്ടുണ്ടെന്ന് അധികൃതർ വ്യക്തമാക്കി. അവധിയിലുള്ള പോലീസുകാർ ഡ്യൂട്ടിയിൽ പ്രവേശിക്കണമെന്ന് മുബൈ പോലീസ് കമ്മീഷണർ നിർദ്ദേശിച്ചു. നിലവിൽ മുംബൈയിൽ നിരോധനാജ്ഞ പ്രഖ്യാപിച്ചിരിക്കുകയാണ്.
ഹോട്ടലുകൾ, റസ്റ്റോറന്റുകൾ, ഹാളുകൾ, ബാറുകൾ, പബ്ബുകൾ, റിസോർട്ടുകൾ, ക്ലബ്ബുകൾ, റൂഫ് ടോപ്പുകൾ എന്നിവയുൾപ്പെടെ അടച്ചതോ തുറസായതോ ആയ എല്ലായിടത്തും പുതുവത്സര ആഘോഷങ്ങൾ, പരിപാടികൾ, ചടങ്ങുകൾ, ഒത്തുചേരലുകൾ തുടങ്ങിയവയ്ക്കും പോലീസ് നിരോധനം ഏർപ്പെടുത്തി.