കാൺപുർ: ഉത്തർപ്രദേശിലെ കാൺപുർ മെട്രോ ഉദ്ഘാടനം ചെയ്ത് പ്രധാനമന്ത്രി നരേന്ദ്ര മോദി. രാജ്യത്ത് ഏറ്റവും വേഗത്തിൽ പൂർത്തീകരിച്ച മെട്രോയാണിത്. വെറും രണ്ട് വർഷത്തിൽ താഴെ മാത്രമാണ് മെട്രോ നിർമ്മാണം പൂർത്തീകരിക്കാനായി എടുത്തത്. മെട്രോയുടെ ആദ്യ ഇടനാഴിയുടെ ഉദ്ഘാടനമാണ് പ്രധാനമന്ത്രി നിർവ്വഹിച്ചത്. 2019 നവംബർ 15 നാണ് യോഗി ആദിത്യനാഥ് സർക്കാർ കാൺപുർ മെട്രോയുടെ നിർമ്മാണ പ്രവർത്തനം ആരംഭിച്ചത്.
2021 നവംബർ 10 ന് മെട്രോ ട്രയൽ റൺ നടത്തി. 32 കിലോമീറ്ററാണ് കാൺപുർ മെട്രോ പദ്ധതി. ഇപ്പോഴും ഇതിന്റെ പണി പുരോഗമിച്ചു കൊണ്ടിരിക്കുകയാണ്. 11,000 കോടി രൂപയിലാണ് പദ്ധതിയുടെ നിർമ്മാണം പൂർത്തിയാക്കിയത്. നഗരത്തിലെ ഗതാഗതക്കുരുക്ക് അവസാനിപ്പിക്കുക എന്ന ലക്ഷ്യത്തോടെയാണ് മെട്രോ സർവ്വീസ് ആരംഭിക്കാൻ തീരുമാനിച്ചത്. ഡിപിആറിന്റെ അടിസ്ഥാനത്തിൽ രണ്ട് ഇടനാഴികൾക്കാണ് സർക്കാർ അനുമതി നൽകിയത്. ഇതിൽ ആദ്യത്തെ ഇടനാഴിയുടെ ഉദ്ഘാടനമാണ് പ്രധാനമന്ത്രി നിർവ്വഹിച്ചത്.
ഉത്തർപ്രദേശിന്റെ വികസനത്തിന് വേണ്ടി ഇരട്ട എഞ്ചിനുള്ള കേന്ദ്ര – സംസ്ഥാന സർക്കാരുകൾ വളരെ വേഗത്തിൽ പ്രവർത്തിക്കുന്നുവെന്നായിരുന്നു പ്രധാനമന്ത്രി നരേന്ദ്ര മോദി അറിയിച്ചത്. ഹനുമാൻ ജിയുടെ അനുഗ്രഹമുള്ള ദിവസമാണിന്നെന്നും ഉത്തർപ്രദേശിന്റെ വികസനത്തിലെ മറ്റൊരു സുവർണ്ണ അധ്യായം കൂടിയായി മെട്രോ റെയിൽ മാറുമെന്നും അദ്ദേഹം വ്യക്തമാക്കി. മെട്രോയിൽ കൂടി ഞാൻ യാത്ര ചെയ്തു. ഇതെനിക്ക് മറക്കാനാവാത്ത ഒരു അനുഭവമാണെന്നും അദ്ദേഹം അഭിപ്രായപ്പെട്ടു.