വാട്സ്ആപ്പ് ഗ്രൂപ്പിലെ എല്ലാവരുടെയും സന്ദേശങ്ങള് ഇല്ലാതാക്കാന് ഗ്രൂപ്പ് അഡ്മിന്മാരെ അനുവദിക്കുന്നതിനുള്ള ഫീച്ചര് ഉടന് പരീക്ഷിക്കാനൊരുങ്ങി കമ്പനി. ഒരു ഗ്രൂപ്പ് അഡ്മിന് ഒരു സന്ദേശം സൂക്ഷിക്കാനോ ഇല്ലാതാക്കാനോ ഇതുവഴി സാധിക്കും.
പുതിയ 2.22.1.1 അപ്ഡേറ്റിലാണ് ഗ്രൂപ്പ് മെസേജുകള് ഇല്ലാതാക്കാന് ഗ്രൂപ്പ് അഡ്മിന്മാരെ അനുവദിക്കുന്ന ഫീച്ചര് വരുന്നത്. സന്ദേശം ഡിലീറ്റ് ചെയ്യപ്പെടുമ്പോള് ‘അത് ഒരു അഡ്മിന് നീക്കം ചെയ്തതാണ്’ എന്ന നോട്ടിഫിക്കേഷന് കാണിക്കും. ഒരു ഗ്രൂപ്പില് എത്ര അഡ്മിന്മാര് ഉണ്ടായാലും എല്ലാവര്ക്കും സന്ദേശങ്ങള് ഡിലീറ്റ് ചെയ്യാനുള്ള അവകാശവും ഉണ്ടായിരിക്കും. വാട്സ്ആപ്പ് ഗ്രൂപ്പുകളെ മോഡറേറ്റ് ചെയ്യാന് ഗ്രൂപ്പ് അഡ്മിന്മാര്ക്ക് കൂടുതല് അധികാരം നല്കുന്ന ഈ ഫീച്ചര് ബീറ്റാ ടെസ്റ്ററുകള്ക്കായി ഇതുവരെ ലോഞ്ച് ചെയ്തിട്ടില്ലെന്നാണ് റിപ്പോര്ട്ടുകള്.
അപകീര്ത്തിപരമോ അശ്ലീലമോ ആയ സന്ദേശങ്ങള് ഇല്ലാതാക്കാന് ഗ്രൂപ്പ് അഡ്മിന്മാര്ക്ക് ഇനി എളുപ്പമായിരിക്കും. ഗ്രൂപ്പിന്റെ താല്പ്പര്യങ്ങള്ക്ക് വിരുദ്ധമായ സന്ദേശങ്ങള് നീക്കം ചെയ്യാനും ഇത് അഡ്മിന്മാരെ സഹായിക്കും. ‘ഡിലീറ്റ് മെസേജ്’ ഫീച്ചറിന്റെ സമയപരിധി നീട്ടാനുള്ള സാധ്യതയെക്കുറിച്ച് കുറച്ച് ദിവസങ്ങള്ക്ക് മുമ്പ് കമ്പനി പറഞ്ഞിരുന്നു.