ന്യൂഡൽഹി: കേന്ദ്രമന്ത്രിമാരുടെ യോഗം വിളിച്ച് ആഭ്യന്തര മന്ത്രി അമിത് ഷാ. രാജ്യത്ത് കൽക്കരി പ്രതിസന്ധി രൂക്ഷമായതിനെ തുടർന്നാണ് നടപടി. കൽക്കരി, ഊർജ മന്ത്രിമാരാണ് അമിത് ഷാ വിളിച്ചു ചേർത്ത യോഗത്തിൽ പങ്കെടുത്തത്. എൻ.ടി.പി.സിയിലെ ഉന്നത ഉദ്യോഗസ്ഥരും യോഗത്തിലുണ്ടായിരുന്നു. കൽക്കരി ക്ഷാമത്തെ തുടർന്ന് നിരവധി സംസ്ഥാനങ്ങൾ വൈദ്യുതി ക്ഷാമം നേരിടുന്ന പശ്ചാത്തലത്തിലായിരുന്നു യോഗം വിളിച്ചു ചേർത്തത്. പവർ പ്ലാന്റുകളിലെ കൽക്കരിയുടെ ലഭ്യത, ഊർജ ആവശ്യം തുടങ്ങിയ കാര്യങ്ങളെല്ലാം യോഗത്തിൽ ചർച്ചാ വിഷയമായി.
പവർ പ്ലാന്റുകളിൽ 7.2 ദശലക്ഷം ടൺ കൽക്കരിയുണ്ടെന്നും അടുത്ത നാല് ദിവസത്തേക്ക് ആശങ്കപ്പെണ്ടതില്ലെന്നുമാണ് കേന്ദ്ര സർക്കാർ നൽകുന്ന വിശദീകരണം. സർക്കാർ ഉടമസ്ഥതയിലുള്ള കോൾ ഇന്ത്യ ലിമിറ്റഡ് 40 ദശലക്ഷം ടൺ സ്റ്റോക്കുണ്ടെന്നും കേന്ദ്രം വിശദമാക്കിയിരുന്നു.അതേസമയം ഉത്തരേന്ത്യൻ സംസ്ഥാനങ്ങളിൽ അനൗദ്യോഗിക പവർ കട്ട് തുടരുകയാണ്. കേന്ദ്ര വിഹിതം കുറഞ്ഞത് കാരണമാണ് പലസ്ഥലങ്ങളിലും വൈദ്യുതി പ്രതിസന്ധി രൂക്ഷമായത്.