പൃഥ്വിരാജും സുരാജ് വെഞ്ഞാറമൂടും പ്രധാന വേഷത്തിലെത്തി മലയാളത്തില്‍ സുപ്പര്‍ഹിറ്റായ ഡ്രൈവിങ് ലൈസന്‍സ് ബോളിവുഡിലേക്ക്. ചിത്രത്തിന്റെ റീമേക്കിങ് പ്രഖ്യാപിച്ചു.
ബോളിവുഡിലെ സൂപ്പര്‍താരം അക്ഷയ്കുമാറും ഇമ്രാന്‍ ഹാഷ്മിയുമാണ് ഡ്രൈവിങ് ലൈസന്‍സിന്റെ ഹിന്ദി റീമേക്കില്‍ പ്രധാന വേഷത്തിലെത്തുന്നത്.
പൃഥ്വിരാജിന്റെ വേഷമാണ് അക്ഷയ് കുമാര്‍ കൈകാര്യം ചെയ്യുക. സുരാജ് വെഞ്ഞാറമൂടിന്റെ വെഹിക്കിള്‍ ഇന്‍സ്‌പെക്ടറുടെ കഥാപാത്രത്തിലാകും ഇമ്രാന്‍ ഹാഷ്മി എത്തുക.
ആദ്യമായാണ് ഇരു താരങ്ങളും സിനിമയില്‍ ഒന്നിക്കുന്നത്. രാജ് മേഹ്ത സംവിധാനം ചെയ്യുന്ന ചിത്രം ധര്‍മ പ്രൊഡക്ഷന്‍സിന്റെ ബാനറില്‍ കരണ്‍ ജോഹര്‍ നിര്‍മിക്കുന്നു.
സച്ചി തിരക്കഥ എഴുതിയ ചിത്രം മലയാളത്തില്‍ സംവിധാനം ചെയ്തത് ജീന്‍ പോള്‍ ലാല്‍ ആയിരുന്നു. മിയ, ദീപ്തി സതി, സൈജു കുറുപ്പ്, മേജര്‍ രവി എന്നിവരും ചിത്രത്തില്‍ പ്രധാനവേഷങ്ങള്‍ ചെയ്തിരുന്നു.
പൃഥ്വിരാജിനേയും ബിജു മേനോനേയും പ്രധാന കഥാപാത്രങ്ങളാക്കി സച്ചി ഒരുക്കിയ അയ്യപ്പനും കോശിയും, അന്ന ബെന്നിന്റെ ഹെലന്‍ എന്നിവയും ബോളിവുഡ് റീമേക്ക് പ്രഖ്യാപിച്ചിട്ടുണ്ട്.