ന്യൂഡൽഹി: സംസ്ഥാനങ്ങൾക്ക് റവന്യു കമ്മി ഗ്രാന്റിന്റെ അഞ്ചാമത്തെ ഗഡു അനുവദിച്ച് കേന്ദ്ര സർക്കാർ. സംസ്ഥാനങ്ങൾക്ക് 9,871 കോടി രൂപയാണ് റവന്യൂ കമ്മി ഗ്രാന്റിന്റെ അഞ്ചാമത്തെ പ്രതിമാസ ഗഡുവായി ധനകാര്യ മന്ത്രാലയം വിതരണം ചെയ്തത്. ഈ സാമ്പത്തിക വർഷത്തിൽ യോഗ്യതയുള്ള സംസ്ഥാനങ്ങൾക്ക് 49,355 കോടി രൂപയാണ് കേന്ദ്ര സർക്കാർ ഇതുവരെ അനുവദിച്ചത്.
റവന്യു കമ്മി ഗ്രാന്റ് വഴി ഏറ്റവും അധികം തുക ലഭിച്ചത് കേരളത്തിനാണ്. കേരളത്തിന് അഞ്ചാം ഗഡുവായി 1657.58 കോടി രൂപയാണ് ലഭിച്ചത്. ആകെ 8287. 92 കോടി രൂപ കേരളത്തിന് ലഭ്യമായി. പതിനഞ്ചാം ധനകാര്യകമ്മീഷൻ മൊത്തം റവന്യൂകമ്മി ഗ്രാന്റ് ഇനത്തിൽ 2021-22 സാമ്പത്തിക വർഷത്തിൽ 17 സംസ്ഥാനങ്ങൾക്ക് 1,18,452 കോടി രൂപ ശുപാർശ ചെയ്തിട്ടുണ്ടെന്നും ഇതിൽ നിന്നും 49,355 കോടി രൂപ(41.67%) ആണ് ഇതുവരെ വിതരണം ചെയ്തതെന്നും കണക്കുകൾ വ്യക്തമാക്കുന്നു. കേരളത്തിന് ശേഷം റവന്യു കമ്മി ഗ്രാന്റ് വഴി ഏറ്റവും അധികം തുക ലഭിച്ച മറ്റൊരു സംസ്ഥാനമാണ് ആന്ധ്രാപ്രദേശ്. 7190 കോടി രൂപയാണ് ആന്ധ്രാപ്രദേശിന് ലഭിച്ചത്.