തിരുവനന്തപുരം: സംസ്ഥാനത്ത് സ്ത്രീകൾക്കെതിരെയുള്ള അതിക്രമം വർധിച്ചു വരുന്ന സാഹചര്യത്തിൽ പ്രതിഷേധവുമായി ഗവർണർ ആരിഫ് മുഹമ്മദ് ഖാൻ. സ്ത്രീകൾക്ക് എതിരെയുള്ള അക്രമങ്ങൾക്കെതിരെയും സ്ത്രീ സുരക്ഷിത കേരളത്തിനും വേണ്ടി ആരിഫ് മുഹമ്മദ് ഖാൻ ഉപവാസസമരം നടത്തും. ബുധനാഴ്ച രാവിലെ തിരുവനന്തപുരം ഗാന്ധിഭവനിലാണ് ഗവർണർ ഉപവാസസമരം നടത്തുന്നത്. ബുധനാഴ്ച രാവിലെ 8 മണി മുതൽ വൈകിട്ട് 6 മണി വരെയാണ് സമരം.
കേരള ഗാന്ധി സ്മാരക നിധിയും ഇതര ഗാന്ധിയൻ സംഘടനകളും ചേർന്നാണ് ഉപവാസ സമരം സംഘടിപ്പിക്കുന്നത്. ബുധനാഴ്ച വൈകിട്ട് 4.30 ന് തിരുവനന്തപുരം ഗാന്ധിഭവനിൽ നടക്കുന്ന ഉപവാസ- പ്രാർത്ഥനായജ്ഞത്തിലും ഗവർണർ പങ്കെടുക്കും. തുടർന്ന് 6 മണിക്ക് ഗവർണർ ഉപവാസം അവസാനിപ്പിക്കും. സ്ത്രീ സുരക്ഷ ലക്ഷ്യമാക്കി സംസ്ഥാന വ്യാപകമായി പരിപാടികൾ സംഘടിപ്പിക്കാനാണ് ഗാന്ധിയൻ സംഘടനകളുടെ തീരുമാനം. ജില്ലകൾ തോറും നടത്തുന്ന ജനജാഗ്രതാ പരിപാടികളുടെ ഉദ്ഘാടനവും ഗവർണർ നിർവഹിക്കുമെന്ന് ഗാന്ധി സ്മാരക നിധി അറിയിച്ചു.