തിരുവനന്തപുരം: സംസ്ഥാനത്ത് ലോക്ഡൗണ് നീട്ടിയ സാഹചര്യത്തില് 12, 13 തീയതികളില് കര്ശന നിയന്ത്രണങ്ങളോടെയുള്ള സമ്പൂര്ണ ലോക്ക്ഡൗണ് ആയിരിക്കുമെന്ന് കൊവിഡ് അവലോകന യോഗത്തില് മുഖ്യമന്ത്രി പിണറായി വിജയന് അറിയിച്ചു. കോവിഡ് വ്യാപനം കുറയാത്തതിന്റെ സാഹചര്യത്തിലാണ് ലോക്ഡൗണ് നീട്ടിയത്. ബാങ്കുകള് നിലവിലുള്ളതുപോലെ തിങ്കള്, ബുധന്, വെള്ളി ദിവസങ്ങളില് പ്രവര്ത്തിക്കും. സ്റ്റേഷനറി, ജുവലറി, പാദരക്ഷകളുടെ ഷോറൂം, തുണിക്കടകള്, ഒപ്റ്റിക്കല്സ് തുടങ്ങിയ കടകള്ക്ക് ജൂണ് 11ന് ഒരു ദിവസം മാത്രം രാവിലെ 7 മുതല് വൈകീട്ട് 7 വരെ പ്രവര്ത്തനാനുമതി നല്കും. വാഹന ഷോറൂമുകള് മെയിന്റനന്സ് വര്ക്കുകള്ക്ക് മാത്രം ജൂണ് 11ന് തുറക്കാവുന്നതാണ്. മറ്റ് പ്രവര്ത്തനങ്ങളും വില്പനയും അനുവദിക്കില്ല.സര്ക്കാര്, അര്ദ്ധ സര്ക്കാര് സ്ഥാപനങ്ങള്, പൊതുമേഖലാ സ്ഥാപനങ്ങള്, കോര്പറേഷനുകള്, കമ്മീഷനുകള് തുടങ്ങിയവ ജൂണ് 17 മുതല് 50 ശതമാനം ഉദ്യോഗസ്ഥരെ ഉള്പ്പെടുത്തി പ്രവര്ത്തനം ആരംഭിക്കുമെന്നും മുഖ്യമന്ത്രി അറിയിച്ചു.
2021-06-08