സൗന്ദര്യ സംരക്ഷണത്തിന് പ്രാധാന്യം നൽകുന്നവരാണ് നമ്മളിൽ പലരും. ഇതിനായി പലപ്പോഴും നമ്മൾ വലിയ തുക മുടക്കാറുണ്ട്. എന്നാൽ, സൗന്ദര്യ സംരക്ഷണത്തിന് വീട്ടിൽ തന്നെ ചില പൊടിക്കൈകൾ പ്രയോഗിക്കാം. അവ എന്തൊക്കെയാണെന്ന് നോക്കാം.
മഞ്ഞൾ
ചർമസൗന്ദര്യത്തിന് മഞ്ഞൾ ഉത്തമമാണ്. സോറിയാസിസ് ഉൾപ്പെടെയുള്ള ചർമരോഗങ്ങൾക്കും മഞ്ഞൾ മരുന്നായി ഉപയോഗിക്കുന്നു. പ്രകൃതിദത്തമായ ആന്റിസെപ്ടിക് ആണ് മഞ്ഞൾ. ബാക്ടീരിയയെ ചെറുക്കാൻ കഴിവുള്ളതുകൊണ്ട് മുറിവ് ഉണങ്ങാൻ നല്ലതാണ്. മഞ്ഞളിലടങ്ങിയിരിക്കുന്ന കുർക്കുമിൻ എന്ന ഘടകമാണ് ചർമ്മത്തിനെ മെച്ചപ്പെടുത്തുന്നതിന് സഹായിക്കുന്നത്. സൂര്യനിൽ നിന്നുള്ള അൾട്രാവയലറ്റ് കിരണങ്ങൾ ചർമ്മത്തിനേൽപിക്കുന്ന കേടുപാടുകൾ പരിഹരിക്കുന്നതിനും മഞ്ഞൾ സഹായിക്കും.
നെയ്യ്
ചർമ്മത്തിന്റെ ആരോഗ്യത്തിന് ഗുണം ചെയ്യുന്ന ഒമേഗ 3 ഫാറ്റി ആസിഡുകളും ആന്റിഓക്സിഡന്റുകളാലും സമ്പന്നമാണ് നെയ്യ്. ചർമ്മത്തിന് തിളക്കവും ആരോഗ്യവും നിലനിർത്താൻ നെയ്യ് സഹായിക്കും. എല്ലുകൾക്ക് ബലവും ഉറപ്പും വർദ്ധിപ്പിക്കാനും നെയ്യ് കഴിക്കുന്നത് നല്ലതാണ്.
ആര്യവേപ്പ്
പലവിധത്തിലുള്ള അണുബാധകളെയും ചെറുക്കാൻ കഴിവുള്ള ഒന്നാണ് ആര്യവേപ്പ്. അതിനാൽ ആര്യവേപ്പില തേക്കുന്നത് മുഖത്തിന് വളരെ നല്ലതാണ്. മുഖക്കുരുവിനെ ചെറുക്കാനും മുഖക്കുരു പാടുകൾ നീക്കാനുമെല്ലാം ആര്യവേപ്പില സഹായിക്കും.
കറ്റാർവാഴ
ചർമ്മത്തിൽ ചുളിവുകളോ പാടുകളോ വീഴുന്നത് തടയാനും ചർമ്മം തിളക്കമുള്ളതാക്കാനും കറ്റാർവാഴ ഉപയോഗിക്കുന്നത് നല്ലതാണ്.