ഉപഭോക്താക്കള്‍ക്ക് ആധാര്‍ നമ്ബര്‍ ഉപയോഗിച്ച് യു.പി.ഐയില്‍ രജിസ്റ്റര്‍ ചെയ്യുന്നതിനുള്ള സംവിധാനവുമായി നാഷണല്‍ പെയ്‌മെന്റ് കോര്‍പ്പറേഷന്‍ ഓഫ് ഇന്ത്യ. ഇതിലൂടെ ഗൂഗിള്‍ പേ ഉപഭോക്താക്കള്‍ക്ക് ആധാര്‍ നമ്ബര്‍ ഉപയോഗിച്ച് യു.പി.ഐ സേവനങ്ങളിലേക്ക് ലോഗ് ഇന്‍ ചെയ്യാം. ഇത്തരത്തില്‍ ചെയ്യുമ്‌ബോള്‍ ഡെബിറ്റ് കാര്‍ഡ് വിവരങ്ങള്‍ പങ്കുവെക്കേണ്ടതില്ലെന്നതാണ് പ്രത്യേകത.
നിലവില്‍ ചില ബാങ്കുകള്‍ മാത്രമാണ് ഈ സേവനം നല്‍കുന്നത്. വരും ദിവസങ്ങളില്‍ കൂടുതല്‍ ബാങ്കുകള്‍ പുതിയ സേവനം ലഭ്യമാക്കുമെന്നാണ് പ്രതീക്ഷ. ഇതിനായി ആധാര്‍ ബാങ്ക് അക്കൗണ്ടുമായി ബന്ധിപ്പിച്ചിരിക്കണം, ഇതിനോടൊപ്പം ബാങ്കിലും ആധാര്‍ സൈറ്റിലും രജിസ്റ്റര്‍ ചെയ്ത ഫോണ്‍ നമ്ബര്‍ ഒന്നായിരിക്കുകയും വേണം. പുതിയ സേവനം ലഭിക്കുന്നതിനായി ആദ്യം ഗൂഗിള്‍ പേ ഓപ്പണ്‍ ചെയ്ത് യു.പി.ഐ ഓണ്‍ബോര്‍ഡിങ് ഓപ്ഷനില്‍, ആധാര്‍ അടിസ്ഥാനമാക്കിയുള്ള യു.പി.ഐ ഓണ്‍ബോര്‍ഡിംഗ് തെരഞ്ഞെടുക്കുക. ശേഷം ആധാര്‍ നമ്ബറിന്റെ ആദ്യ ആറ് അക്കങ്ങള്‍ നല്‍കണം. തുടര്‍ന്ന് യു.ഐ.ഡി.എ.ഐയില്‍ നിന്ന് ലഭിക്കുന്ന ഒ.ടി.പി ഉപയോഗിച്ച് ബാങ്കിന്റെ കൂടി സഹായത്തോടെ രജിസ്ട്രേഷന്‍ പൂര്‍ത്തിയാക്കാം. ഇതിന് ശേഷം യു.പി.ഐ പിന്‍ സെറ്റ് ചെയ്യാനും സാധിക്കും.
യുപിഐ ആക്ടിവേഷന്‍ പൂര്‍ത്തിയായിക്കഴിഞ്ഞാല്‍, ഉപഭോക്താക്കള്‍ക്ക് ഗൂഗിള്‍ പേ ആപ്പ് വഴി ഇടപാടുകള്‍ നടത്താനും ബാലന്‍സ് പരിശോധിക്കാനും കഴിയും. യുണീക്ക് ഐഡന്റിഫിക്കേഷന്‍ അതോറിറ്റി ഓഫ് ഇന്ത്യയുടെ (യു.ഐ.ഡി.എ.ഐ) കണക്കുകള്‍ പ്രകാരം രാജ്യത്ത് 99.9% പേര്‍ക്കും ആധാര്‍ നമ്ബര്‍ ഉണ്ട്, മാസത്തില്‍ ഒരിക്കലെങ്കിലും അത് ഉപയോഗിക്കുന്നുമുണ്ട്. ഭൂരിഭാഗം പേര്‍ക്കും ആധാര്‍ കാര്‍ഡുള്ളതിനാല്‍, കൂടുതല്‍ ഉപേഭോക്താക്കള്‍ ഈ സൗകര്യം ഉപയോഗപ്പെടുത്തുമെന്നും ഡിജിറ്റല്‍ പെയ്‌മെന്റുകള്‍ വര്‍ധിക്കുമെന്നുമാണ് പ്രതീക്ഷ.