അഹമ്മദാബാദ്: ഇന്നലെ നടക്കേണ്ടിയിരുന്ന ഐ.പി.എല് ഫൈനല്കനത്ത മഴമൂലം ഇന്നത്തേക്ക് മാറ്റി. ചെന്നൈ സൂപ്പര് കിംഗ്സും ഗുജറാത്ത് ടൈറ്റാന്സും തമ്മിലുള്ള മത്സരം ഇന്ന് രാത്രി 7.30ന് ഇതേ വേദിയില് നടക്കും. ഇതാദ്യമായാണ് ഐ.പി.എല് ഫൈനല് മാറ്റിവയ്ക്കേണ്ടിവന്നത്.
ഇന്നലെ രാത്രി 7.30നാണ് മത്സരം ആരംഭിക്കേണ്ടിയിരുന്നത്. എന്നാല്, ടോസ് ഇടാന്പോലും അനുവദിക്കാതെ മഴ പെയ്തുകൊണ്ടിരുന്നു. ഇതോടെ എത്ര ഓവര് വെട്ടിക്കുറച്ചുള്ള ഫൈനല് നടത്താനാകും എന്ന കണക്കുകൂട്ടലുകളായി. ഫൈനലിന് റിസര്വ് ഡേ ഉള്ളതിനാല് ഇന്നലെ ഒരു പന്തുപോലും എറിയാന് കഴിയാതെവന്നാല് മത്സരം മാറ്റിവയ്ക്കുമെന്നുള്ള ആശ്വാസവാര്ത്തയുമെത്തി. എന്നാല് 8.50ഓടെ മഴ അല്പ്പം ശമിച്ചത് പ്രതീക്ഷയുണര്ത്തി. പക്ഷേ അഞ്ചുമിനിട്ടികം വീണ്ടും മഴ ആരംഭിച്ചു. ഈ മഴ അധികം വൈകാതെ തോര്ന്നതോടെ ഗ്രൗണ്ടില് നിന്ന് കവറുകള് മാറ്റാന് തുടങ്ങി. എന്നാല് 9.20നും മത്സരം തുടങ്ങാന് കഴിയും വിധം ഗ്രൗണ്ട് ഒരുക്കാന് കഴിഞ്ഞില്ല. അപ്പോഴേക്കും വീണ്ടും മഴയും തുടങ്ങി. മഴ 11 മണിയായിട്ടും തോരാതിരുന്നതോടെയാണ് കളി മാറ്റിവയ്ക്കാന് തീരുമാനിച്ചത്.