ഓരോ ലോകകപ്പ് ഫുട്ബോൾ മത്സരത്തിനും മുന്നോടിയായി ഫിഫ ഔദ്യോഗികമായി ഗാനങ്ങൾ പുറത്തിറക്കാറുണ്ട്. 1962-ലെ ചിലി ലോകകപ്പ് മുതലാണ് ഇത് നടപ്പിലാക്കി തുടങ്ങിയത്. ഒഫിഷ്യൽ ആന്തം, ഒഫിഷ്യൽ സോങ്, പ്രൊമോഷണൽ സോങ് എന്നിങ്ങനെയുള്ള ഗാനങ്ങളാണ് ഫിഫ പുറത്തിറക്കുക. ഇംഗ്ലീഷ്, സ്പാനിഷ്, ഇവയോടൊപ്പം ഓരോ തവണയും ലോകകപ്പ് മത്സരത്തിന് ആതിഥേയത്വം വഹിക്കുന്ന രാജ്യത്തിന്റെ ഭാഷ തുടങ്ങിയ ഭാഷകളിൽ ഫിഫ ഗാനങ്ങൾ ചിട്ടപ്പെടുത്തും. ഇത്തരത്തിൽ ഫിഫ ചിട്ടപ്പെടുത്തിയ വക്ക വക്ക എന്ന ഗാനം വൈറലായിരുന്നു. 2010 ലോകകപ്പിനോടനുബന്ധിച്ചാണ് ഫിഫ ഈ ഗാനം പുറത്തിറക്കിയത്. 2010 ലെ ലോകകപ്പിന് വേദിയായത് ദക്ഷിണാഫ്രിക്കയായിരുന്നു.
വക്ക വക്ക എന്ന ഗാനം യൂട്യൂബിൽ ഇതിനോടകം മൂന്നൂറ് കോടിയിലേറെ വ്യൂസാണ് നേടിയത്. ഇംഗ്ലീഷ്, സ്പാനിഷ്, ഫാങ് എന്നീ ഭാഷകൾ ഗാനത്തിനായി ഉപയോഗപ്പെടുത്തിയിരുന്നു. കൊളംബിയൻ ഗായിക ഷക്കീറയും അമേരിക്കൻ സംഗീതപ്രവർത്തകൻ ജോൺ ഹില്ലും ചേർന്നാണ് ഗാനത്തിന്റെ രചനയും സംഗീത സംവിധാനവും നിർവഹിച്ചത്. ഗാനം ഏറെ പ്രശംസ നേടിയെങ്കിലും ദക്ഷിണാഫ്രിക്കൻ കലാകാരനെ പരിഗണിക്കാതെ മറ്റൊരു രാജ്യക്കാരിയായ ഷക്കീറയെ ഗാനമേൽപ്പിച്ച ഫിഫക്കെതിരെ ദക്ഷിണാഫ്രിക്കക്കാർ പ്രതിഷേധവുമായി രംഗത്തെത്തിയിരുന്നു.
ദക്ഷിണാഫ്രിക്കൻ മ്യൂസിക് ബാൻഡായ ഫ്രെഷ്ലി ഗ്രൗണ്ട് ഷക്കീറയോടൊപ്പം ഗാനരംഗത്തിലുണ്ടായിരുന്നു. അമേരിക്കൻ സംവിധായകനായ മാർക്കസ് റബോയ് ആണ് ഗാനത്തിന്റെ ദൃശ്യാവിഷ്കാരം നൽകിയത്. ക്രിസ്റ്റ്യാനോ റൊണാൾഡോ, ലയണൽ മെസ്സി തുടങ്ങി നിരവധി താരങ്ങൾ അണിനിരന്ന ഗാനത്തിന്റെ വീഡിയോയും ഏറെ ശ്രദ്ധ നേടിയിരുന്നു. വീഡിയോയുടെ ദൃശ്യനിർണയത്തിൽ ഷക്കീറക്കൊപ്പം അന്റോണിയോ നവാസും പ്രധാന പങ്കുവഹിച്ചു. ഒരു വേൾഡ് ട്രിപ്പ് പോലെ, ആഫ്രിക്കയിൽ സഞ്ചാരം അവസാനിപ്പിക്കുന്ന വിധത്തിൽ വീഡിയോ ചിത്രീകരിക്കാമെന്ന നിർദേശം നൽകിയത് അന്റോണിയോ ആയിരുന്നു.