തിരുവനന്തപുരം: തലസ്ഥാനത്ത് സിപിഎമ്മിന്റെ ജില്ലാ സമ്മേളനത്തോടനുബന്ധിച്ച് നടന്ന മെഗാ തിരുവാതിര കൊവിഡ് മാനദണ്ഡങ്ങള് ലംഘിച്ചെന്ന പേരില് വിവാദത്തില്. 550-ലേറെ പേരാണ് മെഗാ തിരുവാതിരയില് പങ്കെടുത്തത്.
സംസ്ഥാനത്തെ പൊതുപരിപാടികളില് 150 പേരില് കൂടരുതെന്ന സര്ക്കാര് നിയന്ത്രണം നിലനില്ക്കവെയാണ് ഇത്രയധികം പേര് പങ്കെടുത്ത മെഗാ തിരുവാതിര സംഘടിപ്പിച്ചത്. മരണാനന്തര, വിവാഹ ചടങ്ങുകളില് 50 പേര് മാത്രമേ പങ്കെടുക്കാന് പാടുള്ളുവെന്ന ഉത്തരവും കഴിഞ്ഞ ദിവസം പുറത്തിറക്കിയിരുന്നു. എന്നാല്, ഇതിനെതിരെ നടപടിയെടുക്കാന് സര്ക്കാര് സംവിധാനങ്ങള് ഇതുവരെ തയ്യാറായിട്ടില്ല.
ഓരോ ലോക്കല് കമ്മിറ്റികള് കേന്ദ്രീകരിച്ച് തിരുവാതിരയുടെ പരിശീലനം കഴിഞ്ഞ ഒരാഴ്ചയായി നടന്നുവരികയായിരുന്നു. ജനാധിപത്യ മഹിള അസോസിയേഷന് പാറശാല ഏരിയ കമ്മിറ്റിയുടെ നേതൃത്വത്തില് പാറശ്ശാലയിലെ ചെറുവാരക്കോണം സിഎസ്ഐ പള്ളി മൈതാനത്ത് ജില്ലാ പഞ്ചായത്ത് അംഗം സലൂജയുടെ നേതൃത്വത്തിലായിരുന്നു പരിപാടി സംഘടിപ്പിച്ചത്. സിപിഎം പോളിറ്റ് ബ്യൂറോ അംഗം എം.എ.ബേബി, ജില്ലാ സെക്രട്ടറി ആനാവൂര് നാഗപ്പന്, ജില്ലാ സെക്രട്ടേറിയറ്റ് അംഗങ്ങളായ എന്. രതീന്ദ്രന്, പുത്തന്കട വിജയന് എന്നിവര് അടക്കമുള്ള നേതാക്കളും പരിപാടി കാണാന് എത്തിയിരുന്നു.