തിരുവനന്തപുരം: ജനങ്ങള്ക്കിടയില് വര്ഗീയത പടര്ത്താന് ശ്രമിക്കുന്നവര്ക്കെതിരെ കര്ശന നടപടിയെടുക്കാന് നിര്ദ്ദേശിച്ച് മുഖ്യമന്ത്രി പിണറായി വിജയന്. സമൂഹത്തില് അസ്വസ്ഥതയും ജനങ്ങള്ക്കിടയില് ഭിന്നതയും വിദ്വേഷവും ഉണ്ടാക്കാനുള്ള ചില ശക്തികളുടെ ശ്രമങ്ങളെ കര്ക്കശമായി നേരിടണമെന്ന് ഉന്നതതല യോഗത്തില് മുഖ്യമന്ത്രി നിര്ദ്ദേശിച്ചു. നാര്ക്കോട്ടിക് ജിഹാദ് വിവാദം ഉയരുന്നതിനിടെയാണ് നിര്ദ്ദേശവുമായി പിണറായി വിജയന് രംഗത്തെത്തിയിരിക്കുന്നത്.
മതനിരപേക്ഷ പാരമ്പര്യവും, മത സാഹോദര്യവും നിലനില്ക്കുന്ന സംസ്ഥാനമാണ് കേരളം, കേരളത്തിന്റെ ഈ പൊതുസ്വഭാവവും സവിശേഷതയും തകര്ക്കാനുള്ള ബോധപൂര്വമായ ശ്രമമാണ് ചില കോണുകളില് നിന്ന് ഉണ്ടാകുന്നത്, ഇത്തരം നീക്കങ്ങള്ക്കെതിരെ ശക്തമായ നടപടി ഉണ്ടാകും. സമൂഹ മാധ്യമങ്ങളിലൂടെയും മറ്റും വിഷലിപ്തമായ പ്രചാരണങ്ങള് ഏറ്റെടുത്ത് വര്ഗീയ വിഭജനമടക്കം ലക്ഷ്യമിട്ട് പ്രവര്ത്തിക്കുന്നവരെ നിര്ദാക്ഷിണ്യം നേരിടും. സമൂഹമാധ്യമങ്ങളിലെ ഇത്തരം പ്രവണത തടയാനും കുറ്റവാളികളെ പിടികൂടി നിയമത്തിനു മുന്നിലെത്തിക്കാനും പ്രത്യേക നിഷ്കര്ഷയുണ്ടാകണമെന്നും മുഖ്യമന്ത്രി നിര്ദേശിച്ചു.
ചീഫ് സെക്രട്ടറി ഡോ. വി.പി.ജോയ്, ആഭ്യന്തര അഡീഷണല് ചീഫ് സെക്രട്ടറി ടി.കെ.ജോസ്, സംസ്ഥാന പൊലീസ് മേധാവി അനില് കാന്ത്, എഡിജിപിമാരായ ടി.കെ.വിനോദ് കുമാര്, മനോജ് എബ്രഹാം തുടങ്ങിയ ഉന്നത പോലീസ് ഉദ്യോഗസ്ഥരും ചീഫ് സെക്രട്ടറിയും പങ്കെടുത്ത യോഗത്തിലാണ് മുഖ്യമന്ത്രിയുടെ നിര്ദേശം.