തിരുവനന്തപുരം: സ്വര്ണാഭരണ വില്പന രംഗത്തെ നികുതി വെട്ടിപ്പ് തടയാനൊരുങ്ങി സംസ്ഥാന സര്ക്കാര്. നികുതി വെട്ടിപ്പിനെതിരെ കര്ശന നടപടികള് സ്വീകരിക്കുമെന്ന് മുഖ്യമന്ത്രി പിണറായി വിജയന് അറിയിച്ചു.
സ്വര്ണക്കടകളിലെ പരിശോധന വ്യാപകമാക്കുമെന്നും, വില്പന നികുതി ഇന്റലിജന്സ് ശക്തിപ്പെടുത്തുമെന്നും മുഖ്യമന്ത്രി പറഞ്ഞു. ഉന്നതതല യോഗത്തിന് ശേഷം പ്രതികരിക്കവെയായിരുന്നു മുഖ്യമന്ത്രി ഇത് സംബന്ധിച്ച തീരുമാനം വ്യക്തമാക്കിയത്.
നികുതി വെട്ടിപ്പ് സാധ്യത കാണുന്ന സ്ഥലങ്ങളില് കര്ശന പരിശോധന നടത്തണം. അത്തരക്കാരുടെ ജിഎസ്ടി രജിസ്ട്രേഷന് റദ്ദാക്കുന്നതുള്പ്പെടെയുള്ള നടപടികളെടുക്കണം. നികുതി പരിവ് കൂടുതല് നടത്തുന്ന ഉദ്യോഗസ്ഥര്ക്ക് മതിയായ ഇന്സന്റീവ് നല്കണം. വലിയ സ്വര്ണക്കടകളിലെ സിസിടിവി ദൃശ്യങ്ങള് ജിഎസ്ടി ഓഫീസിലും പൊലീസ് സ്റ്റേഷനിലും ലഭ്യമാക്കുന്നതിന്റെ സാധ്യത പരിശോധിക്കണമെന്നും മുഖ്യമന്ത്രി യോഗത്തില് വിശദീകരിച്ചു.