ന്യൂഡല്‍ഹി: ഡല്‍ഹി പൊലീസ് കമ്മീഷണര്‍ക്ക് അധികാരം നല്‍കി ലഫ്റ്റനന്റ് ഗവര്‍ണര്‍. രാജ്യസുരക്ഷയ്ക്ക് ഭീഷണിയാണെന്ന് തോന്നിയാല്‍ ആരെയും അറസ്റ്റ് ചെയ്യാമെന്ന് ഡല്‍ഹി പൊലീസ് കമ്മീഷണര്‍ക്ക് ലഫ്റ്റനന്റ് ഗവര്‍ണര്‍ അനില്‍ ബയ്ജാന്‍ അധികാരം നല്‍കി. ഒക്ടോബര്‍ 18 വരെയാണ് പൊലീസ് കമ്മീഷണര്‍ ബാലാജി ശ്രീവാസ്തവയ്ക്ക് അധികാരം നല്‍കിയിരിക്കുന്നത്.
സ്വാതന്ത്ര്യ ദിനം പ്രമാണിച്ച് തലസ്ഥാനത്തെ സുരക്ഷ വര്‍ദ്ധിപ്പിക്കുന്നതും, ജന്തര്‍ മന്ദിറിലെ കര്‍ഷക പ്രക്ഷോഭം ആരംഭിച്ചതുമുള്‍പ്പടെ രാജ്യതലസ്ഥാനത്ത് നിലനില്‍ക്കുന്ന അസാധാരണ സാഹചര്യം മുന്‍നിര്‍ത്തിയാണ് ഉത്തരവ്. എന്നാല്‍ ലഫ്റ്റനന്റ് ഗവര്‍ണറുടെ ഉത്തരവ് സാധാരണ നടപടി മാത്രമാണെന്നാണ് പൊലീസ് ഭാഷ്യം. ദേശീയ സുരക്ഷാ നിയമപ്രകാരമുളള അധികാരങ്ങളാണ് കമ്മീഷണര്‍ക്ക് നല്‍കിയിരിക്കുന്നത്.
അതിര്‍ത്തി കടന്നെത്തി പാക്ക് ഭീകരര്‍ ഓഗസ്റ്റ് അഞ്ചിന് ആക്രമണം അഴിച്ചുവിടാനിടയുണ്ട് എന്ന ഇന്റലിജന്‍സ് അറിയിപ്പിനെ തുടര്‍ന്നും, പാര്‍ലമെന്റിന്റെ മണ്‍സൂണ്‍ സെഷന്‍ അവസാനിക്കുന്നത് വരെ മൂന്ന് കാര്‍ഷിക ബില്ലിനെതിരെ സമരം ചെയ്യുന്ന കര്‍ഷകരുടെ കിസാന്‍ സന്‍സദ്നെ തുടര്‍ന്ന് അനിഷ്ട സംഭവങ്ങള്‍ അരങ്ങേറാതിരിക്കാനും കൂടിയാണ് നടപടിയെന്നാണ് ഔദ്യോഗിക അറിയിപ്പ്.