കൊച്ചി: ഒടിടി പ്ലാറ്റ്ഫോം matinee. live ന്റെ ലോഞ്ചിംഗ് നിർവ്വഹിച്ച് നടൻ പൃഥ്വിരാജ്. ഫഹദ് ഫാസിലാണ് .ഒ.ടി.ടി. പ്ലാറ്റ്ഫോമിന്റെ ലോഗോ ലോഞ്ച് നിർവ്വഹിച്ചത്. മലയാളത്തിലെ തികച്ചും വ്യത്യസ്തമായ പുതിയ ഒടിടി പ്ലാറ്റ്ഫോമാണ് matinee.live. പ്രോജക്റ്റ് ഡിസൈനർ ബാദുഷയും നിർമ്മാതാവ് ഷിനോയ് മാത്യുവുമാണ് പ്ലാറ്റ്ഫോം ആരംഭിച്ചത്.
പുതുമുഖങ്ങളും പ്രതിഭാധനരുമായ അഭിനേതാക്കളെയും ടെക്നീഷ്യൻസിനെയുമെല്ലാം ഉൾപ്പെടുത്തിക്കൊണ്ട് എക്സ്ക്ലൂസിവ് ആയ വെബ്സീരിസുകൾ, സിനിമകൾ, ഷോർട്ട് ഫിലിമുകൾ എന്നിവ നിർമ്മിച്ചുകൊണ്ടായിരിക്കും പ്രാരംഭ ഘട്ടത്തിൽ മാറ്റിനി പ്ലാറ്റ്ഫോം പ്രവർത്തിക്കുന്നത്. അനാവശ്യ ചിലവുകളും ആശയക്കുഴപ്പങ്ങളും ഒഴിവാക്കി സിനിമകളുടെ ഓഡീഷനുകളും നേരിട്ട് സൗകര്യപൂർവം നടത്താനും ഈ ഒടിടി പ്ലാറ്റ്ഫോമിൽ അവസരമൊരുക്കിയിട്ടുണ്ട്.
താത്പര്യമുള്ള ആർക്കും വ്യത്യസ്തമാർന്ന ലോക്കേഷനുകൾ, കെട്ടിടങ്ങൾ, വീടുകൾ, സ്ഥാപനങ്ങൾ, എക്യുപ്മെന്റുകൾ, ട്രെയിൻഡ് പെറ്റ്സ്, വാഹനങ്ങൾ, ആന്റിക് പീസുകൾ തുടങ്ങി സിനിമക്ക് ആവശ്യമായതെന്തും മാറ്റിനിയിൽ രജിസ്റ്റർ ചെയ്ത് റെന്റിന് നൽകാം. സിംഗിൾ രജിസ്ട്രേഷനിലൂടെ മാറ്റിനിയുടെ സ്വന്തം നിർമ്മാണ പ്രോജക്റ്റുളിലേക്കും നിരവധി ഒഡീഷനുകളിലേക്കും സംവിധായകരിലേക്കും നിർമ്മാതാക്കളിലേക്കുമെല്ലാം അപേക്ഷകരുടെ ഡാറ്റാ ബേസുകൾ ലഭ്യമാക്കുന്ന ടാലന്റ് പൂൾ ആയും മാറ്റി പ്രവർത്തിക്കും.
കഴിവുറ്റ പുതുമുഖ സംവിധായകരെ തേടി ഡയറക്ടേഴ്സ് ഹണ്ട് എന്ന പദ്ധതിയും മാറ്റിനി നടപ്പിലാക്കുന്നുണ്ട്. നിങ്ങൾ സംവിധാനം ചെയ്ത ഷോർട്ട് ഫിലിമുകൾ, ഡോക്യൂമെന്ററികൾ, മ്യൂസിക് ആൽബങ്ങൾ തുടങ്ങിയ മികച്ച വീഡിയോകൾ മാറ്റിനിയിൽ അപ്ലോഡ് ചെയ്തുകൊണ്ടാണ് ഡയറക്ടേഴ്സ് ഹണ്ട് കോണ്ടെസ്റ്റിൽ രജിസ്റ്റർ ചെയ്യേണ്ടത്. ഇംഗ്ലീഷ്, തമിഴ്, മലയാളം, തെലുങ്ക്, ഹിന്ദി അങ്ങനെ ഏതു ഭാഷയിലുള്ള വീഡിയോകളും മാറ്റിനിയിൽ അപ്ലോഡ് ചെയ്യാം. വീഡിയോകൾ 30 മിനിട്ടിൽ കവിയരുതെന്നാണ് നിബന്ധന.
സെലക്റ്റ് ചെയ്യപ്പെടുന്ന 30 വീഡിയോകളുടെയും സംവിധായകർക്കായി, ‘ലാബ് ഡേ ഫിലിംസ്’ ഒരുക്കുന്ന അഞ്ചു ദിവസം നീണ്ടു നിൽക്കുന്ന ഒരു ഓറിയെന്റേഷൻ ക്യാമ്പും ഉണ്ടായിരിക്കുന്നതാണ്. മലയാള സിനിമയിലെ പ്രഗത്ഭരായ സംവിധായകരും ഛായാഗ്രാഹകരും തിരക്കഥാകൃത്തുക്കളുമായിരിക്കും ഈ ക്യാമ്പ് നയിക്കുന്നത്. ക്യാമ്പിൽ കഴിവ് തെളിയിക്കുന്ന വ്യക്തിയ്ക്ക് മാറ്റിനി നിർമ്മിക്കുന്ന ചലച്ചിത്രം സംവിധാനം ചെയ്യാനുള്ള അവസരം ലഭിക്കും. ജൂലൈ 17 മുതലായിരിക്കും ഡയറക്ടേഴ്സ് ഹണ്ട് കോണ്ടെസ്റ്റ് ആരംഭിക്കുക.