കൊച്ചി: നടനും എംഎൽഎയുമായ മുകേഷിനെതിരായ പീഡന പരാതിയിൽ പ്രത്യേക അന്വേഷണ സംഘം കുറ്റപത്രം സമർപ്പിച്ചു. ആലുവ സ്വദേശിയായ നടിയുടെ പരാതിയിൽ കുറ്റം തെളിഞ്ഞതായി കുറ്റപത്രത്തിൽ വ്യക്തമാക്കുന്നു. എംഎൽഎക്കെതിരെ ഡിജിറ്റൽ തെളിവുകളുണ്ടെന്ന് അന്വേഷണ സംഘം വ്യക്തമാക്കി.
എറണാകുളം ജുഡീഷ്യൽ മജിസ്ട്രേറ്റ് കോടതിയിലേക്കാണ് കുറ്റപത്രം സമർപ്പിച്ചത്. വാട്ട്സ് ആപ്പ് സന്ദേശങ്ങളും ഇമെയിൽ തെളിവുകളും ഉൾപ്പെടെ മുകേഷിനെതിരെ ഡിജിറ്റൽ രേഖകളുണ്ടെന്നാണ് കണ്ടെത്തൽ. കൂടാതെ, സാഹചര്യത്തെളിവുകളും സാക്ഷിമൊഴികളും അന്വേഷണ സംഘത്തിന് ലഭിച്ചിട്ടുണ്ട്.
താരസംഘടനയായ ‘അമ്മ’യിൽ അംഗത്വം വാഗ്ദാനം ചെയ്ത് വിവിധ ഇടങ്ങളിൽ നടിയെ ലൈംഗികമായി പീഡിപ്പിച്ചുവെന്നാണ് കേസ്. ലൈംഗികാതിക്രമവുമായി ബന്ധപ്പെട്ട വകുപ്പ് ചേർത്ത് മുകേഷിനെതിരെ കുറ്റപത്രം തയ്യാറാക്കിയിട്ടുണ്ട്. നടിയുടെ രഹസ്യമൊഴിയടക്കമുള്ള വിശദാംശങ്ങൾ രേഖപ്പെടുത്തിയിട്ടുണ്ട്. കേസിൽ മുകേഷിന് മുൻകൂർ ജാമ്യം ലഭിച്ചിട്ടുണ്ട്.