ന്യൂഡൽഹി: കോൺഗ്രസിനെതിരെ ആഞ്ഞടിച്ച് പ്രധാനമന്ത്രി നരേന്ദ്ര മോദി. കോൺഗ്രസിന്റെ പ്രകടന പത്രിക മുസ്ലീം ലീഗിന്റേതാണെന്ന് അദ്ദേഹം പറഞ്ഞു. എസ്സി എസ്ടിയേയും ഒബിസിയേയും പ്രതിപക്ഷം കൊള്ളയടിക്കുന്നുവെന്നും അദ്ദേഹം കുറ്റപ്പെടുത്തി. വോട്ട് ബാങ്കിന് വേണ്ടി ഭരണഘടനയെ അട്ടിമറിക്കുന്നു. ഇതിനെതിരായ പോരാട്ടമാണ് താൻ നടത്തുന്നതെന്ന് അദ്ദേഹം അറിയിച്ചു.
പ്രതിപക്ഷത്തിന്റെ പദ്ധതികളെ കുറിച്ച് താൻ ജനങ്ങളെ ബോധവാന്മാരാക്കുകയാണ് ചെയ്യുന്നത്. കഴിഞ്ഞ 24 വർഷമായി താൻ നിരന്തരം ആക്രമണത്തിന് വിധയേമാകുകയാണ്. ജൂൺ നാലിന് പുതിയ കാലഘട്ടത്തിന് തുടക്കമാകുമെന്നും മോദി ചൂണ്ടിക്കാട്ടി.
അതേസമയം, അന്വേഷണ ഏജൻസികളെ ദുരുപയോഗിക്കുന്നുവെന്ന വിമർശനവും പ്രധാനമന്ത്രി തള്ളി. എന്ത് തെളിവാണ് ആരോപണത്തിന് ഉള്ളതെന്ന് അദ്ദേഹം ചോദിക്കുന്നു. അനുച്ഛേദ്ദം 370 റദ്ദാക്കിയത് ജമ്മു കശ്മീരിന് ഗുണകരമായി മാറി. പശ്ചിമ ബംഗാളിൽ ബിജെപി വലിയ വിജയം നേടുമെന്നും പ്രധാനമന്ത്രി കൂട്ടിച്ചേർത്തു.